澳城餐飲

今次少爺為大家介紹位於澳門連勝街《泰友麵》嘅海南雞髀飯。泰友麵主打外賣生意,亦有少量堂食座位畀客人食飯。泰友麵門面雖然唔多華麗,位置雖然近白鴿巢公園,但都唔太容易揾到,幾隱蔽,但最緊要係海南雞髀飯好食到不得了。

2019年1月21日更新:位於連勝街的《泰友麵》已於 2019年1月1日結束營業

少爺某日黃昏大約六點左右到泰友麵買飯盒,好彩當時無太多人,好快就可以落單。點知,企咗大約兩三分鐘之後,已經有好多人走入嚟買飯盒。少爺心諗,好彩行快兩分鐘,否則一定未必買到想要嘅飯啦!所以奉勸大家最好六點前就好去泰友麵買飯啦。 

泰友麵(連勝馬路店)舖面

「泰友麵」門面 

 

 

要去泰友麵的話,最好就係行路或者搭巴士。連勝街本身比較窄,附近未必有車位可以暫時停車。搭巴士的話,只要响白鴿巢公園落車,徒步行約一分鐘就會到。

泰友麵地理位置

地址:澳門連勝街1I號麗豪大廈地下

營業時間:早上 11 點至晚上 9 點,逢星期一休息

坐標:22.199291, 113.540692

巴士路線:8A,17,18,18A,19,26

(白鴿巢前地落車,步行約一分鐘。)

  

今次少爺和公主分別點了青咖喱豬頸肉飯同埋海南雞髀飯,仲會附上特製辣椒醬同甜醬,海南雞髀飯仲會有湯跟埋添。

海南雞脾飯加青咖喱豬頸肉飯

上半部分:海南雞髀飯

下半部分:青咖喱豬頸肉飯

 

 

少爺今次叫咗青咖喱豬頸肉飯,覺得超抵食。上面好大舊嘅其實係茄瓜,大部分豬頸肉都聚晒响底部。青咖喱汁超多超大桶,保證有剩,早知就買定白麵包點黎食,一定超正!

青咖喱豬頸肉飯

青咖喱豬頸肉飯

少爺最後將青咖喱汁留起,第二日朝早用嚟煮麵食,齋青咖喱汁撈麵已經好好味。青咖喱有一定辣度,所以唔食得辣嘅人或者要揀其它款式啦!茄瓜大大件,豬頸肉唔太淋,口感啱啱好,白飯鬆軟有口感。五十蚊澳門幣可以分兩餐嚟食,又好食又抵食,係慳家一族必選之首。

 

 

壓軸登場就係少爺認為係泰友麵嘅招牌菜,係必食首選,係傳說中的隱世美食。如果第一次去泰友麵,唔知點邊樣嘢食好,咁一定要叫海南雞髀飯,一定唔會後悔。假如路環安德魯最出名係葡撻的話,咁泰友麵最出名一定係海南雞髀飯。啖啖新鮮滑溜無骨嘅雞髀肉,配上雞湯、特製辣椒醬同埋甜醬,簡直令人垂涎三尺。特製辣椒醬好野味,比青咖喱汁還要辣,所以要慎點。

雖然少爺只試食了一件雞髀肉,但已經決定下次一定要試海南雞髀飯。唔知大家有無留意飯嘅顏色呢?左邊一半飯係黃色,而另一半係白色。

海南雞脾飯

 海南雞髀飯

兩種唔同飯味道,盡在一個外賣盒之內,都只係五十蚊澳門幣。响出面澳門餐廳食飯,都要咁上下價錢啦!仲有,大家要分清楚海南雞飯同海南雞髀飯,係兩款唔同嘅飯。

海南雞髀飯比海南雞飯要貴五蚊,但好多人一入去都係叫雞髀飯。仲要同老板娘好強烈咁強調話係要雞髀飯,大家都好怕比錯咗海南雞飯。可想而知,海南雞髀飯嘅魔力係十分巨大。

 

泰友麵

總結黎講,泰友麵雖然唔係咩高級餐廳,但十分注重衛生。斬雞廚師會帶上手套,環境都好乾淨。老闆娘講野雖然大聲,但十分温柔體貼。有顧客向佢投訴上次比錯飯,佢都肯作出補償,咁好嘅態度可以去邊度揾?

泰友麵大部分嘅飯都係五十蚊左右,價格算係中等,所以好多附近街坊都會黎幫襯支持。假如大家無無聊聊唔知去邊度揾食的話,不如試試連勝街嘅泰友麵,包您一定滿意。

 

延伸閱讀:

【澳門必試甜品】是柑香茶?是蛋糕?必試連勝街 Baptiste Brichon 的柑香茶法式蛋糕

傳說級稀有度!《怪物彈珠》X《刀劍神域》紀念限量版桐人二刀流手機殼

【澳門手搖界傳奇】大排長龍!沐白黑糖波霸鮮奶可以有幾好飲?

【澳門必影美景】不可錯過的浪漫!最愛夕陽下的澳門旅遊塔

如需聯絡 Chrysalids 少爺,請寄電郵至 youngmasterchrysalids@gmail.com

 

 

[編輯聲明]

文章之內容版權均為作者所有,而CyberCTM僅獲得授權發表。

    最喜歡在澳門四出尋找隱世澳門美食,對甜品和手搖完全是零抵抗力。

    聯絡電郵:youngmasterchrysalids@gmail.com

    熱門推介




    叫我女王 化妝/購物/吹水/諗到物就講物⋯⋯你懂的!
    半島師奶 和家人平凡地過日子,每日的意義在於收看「都市閒情」和「開心速遞」,所以星期六日過得特別痛苦。
    文創不捱餓 // 娛樂小老闆 來自澳門的90後,深信搞文創一樣可以有飽飯食; 夢想打造屬於澳門的娛樂圈; 讓世界欣賞我們的電影、聽到我們的音樂、看見我們的創作。
    Ar B (阿比) 我是一位來自澳門的普通小市民、有著無比的幻想、夢想、喜愛聽、寫、唱、創作同打麻雀!
    綠星人 // 離子 皓愛結合環保與創意,融合生活與大自然,凝造綠色生活,同時反省自己多年來破壞地球的罪行。