辛辣

標籤:辛辣

驅寒必備!期間限定的維他奶薑味豆奶

澳城生活
Chrysalids 少爺 ・2019-02-15

最近維他奶推出了期間限定的「維他奶薑味豆奶」,令一眾怕凍人士在冬天寒冷天氣下,有另一款新驅寒飲品選擇。自從少爺在 Facebook 上看見有網友放上一張「維他奶薑味豆奶」的圖片後,就已經非常想試一試「維他奶薑味豆奶」。之後在農曆新年期間,偶然去 7﹣11 便利店時發現有售賣「維他奶薑味豆奶」,於是便急不及待要買一盒來試,畢竟偏辣味道的盒裝飲品在澳門是很罕有的。 ↑ 維他奶薑味豆奶(正面) 「維他奶薑味豆奶」的背面寫有 3 個大豆的特點:優質蛋白質、非基因改造大豆和多種維他命。 ↑ 維他奶薑味豆奶(背面) 另外飲「維他奶薑味豆奶」之前,當然要看一看「維他奶薑味豆奶」有甚麼營養價值,糖份高不高等等。一看之下,發現「維他奶薑味豆奶」加入了「薑粉」,所以難怪那份薑味並不會太過濃烈,薑味亦不會太過持久。 ↑ 維他奶薑味豆奶(右面) 冬天寒冷的時候,最想就是有杯熱辣辣的熱飲。想飲熱的「維他奶薑味豆奶」,千萬不要把整盒「維他奶薑味豆奶」放入微波爐裏叮,很危險的。一定要先打開飲盒,把裏面的「維他奶薑味豆奶」倒入杯裏,然後才把杯放入微波爐裏叮熱,這樣才是最安全的做法。 ↑ 維他奶薑味豆奶(左面) 少爺試飲沒有加熱的「維他奶薑味豆奶」後覺得,可能是因為無搖勻和無加熱的關係,初入口時並不感到任何薑的辣味,只是飲到豆奶淡淡的甜味,少爺還以為是買錯了。過了大約一至兩秒進入喉嚨後,才感覺到有薑的味道。應該是因為用了薑粉的緣故,才會令到薑味遲了散發出來。如果本身想品嚐薑的辛辣味道的朋友可能要失望了,因為薑味是有的,但並不強烈,薑辣味的持久力亦很短暫。不過對於怕凍人士來說,相信「維他奶薑味豆奶」會是他們的恩物。 今次維他奶公司推出大膽新嘗試,推出了令人感意外的「維他奶薑味豆奶」。「維他奶薑味豆奶」既不是走受大眾歡迎的甜味方向,也不是走能夠快速回復體力的酸味方向,而是走向令人感刺激的辣味方向。雖然「維他奶薑味豆奶」的味道未如理想,有待改進,但這絕對是創新的開端。如果澳門天氣氣温寒冷,家裏沒有薑,而怕凍的您恰巧很想飲一杯可以驅寒保暖的飲品,不妨考慮一試「維他奶薑味豆奶」,相信可以暫時令身體驅走寒氣,令您暫時感到温暖的。 ↑ 驅寒必備!期間限定的維他奶薑味豆奶 推薦閱讀: 【澳門情人節好去處】單身狗快去「婆仔屋願望井」許願求脫單啦! 【澳門手搖優惠】放牛斑白馬行新店推出手搖優惠~

【澳門隱世美食】不可不試!連勝街《泰友麵》海南雞髀飯

飲食天地
Chrysalids 少爺 ・2018-06-15

今次少爺為大家介紹位於澳門連勝街《泰友麵》嘅海南雞髀飯。泰友麵主打外賣生意,亦有少量堂食座位畀客人食飯。泰友麵門面雖然唔多華麗,位置雖然近白鴿巢公園,但都唔太容易揾到,幾隱蔽,但最緊要係海南雞髀飯好食到不得了。 2020年7月13日更新:位於連勝街的《泰友麵》已經易手並改名為《全桶美食》。 2019年1月21日更新:位於連勝街的《泰友麵》已於 2019年1月1日結束營業。 少爺某日黃昏大約六點左右到泰友麵買飯盒,好彩當時無太多人,好快就可以落單。點知,企咗大約兩三分鐘之後,已經有好多人走入嚟買飯盒。少爺心諗,好彩行快兩分鐘,否則一定未必買到想要嘅飯啦!所以奉勸大家最好六點前就好去泰友麵買飯啦。 「泰友麵」門面 要去泰友麵的話,最好就係行路或者搭巴士。連勝街本身比較窄,附近未必有車位可以暫時停車。搭巴士的話,只要响白鴿巢公園落車,徒步行約一分鐘就會到。 地址:澳門連勝街1I號麗豪大廈地下 營業時間:早上 11 點至晚上 9 點,逢星期一休息 坐標:22.199291, 113.540692 巴士路線:8A,17,18,18A,19,26 (白鴿巢前地落車,步行約一分鐘。) 今次少爺和公主分別點了青咖喱豬頸肉飯同埋海南雞髀飯,仲會附上特製辣椒醬同甜醬,海南雞髀飯仲會有湯跟埋添。 上半部分:海南雞髀飯 下半部分:青咖喱豬頸肉飯 少爺今次叫咗青咖喱豬頸肉飯,覺得超抵食。上面好大舊嘅其實係茄瓜,大部分豬頸肉都聚晒响底部。青咖喱汁超多超大桶,保證有剩,早知就買定白麵包點黎食,一定超正! 青咖喱豬頸肉飯 少爺最後將青咖喱汁留起,第二日朝早用嚟煮麵食,齋青咖喱汁撈麵已經好好味。青咖喱有一定辣度,所以唔食得辣嘅人或者要揀其它款式啦!茄瓜大大件,豬頸肉唔太淋,口感啱啱好,白飯鬆軟有口感。五十蚊澳門幣可以分兩餐嚟食,又好食又抵食,係慳家一族必選之首。 壓軸登場就係少爺認為係泰友麵嘅招牌菜,係必食首選,係傳說中的隱世美食。如果第一次去泰友麵,唔知點邊樣嘢食好,咁一定要叫海南雞髀飯,一定唔會後悔。假如路環安德魯最出名係葡撻的話,咁泰友麵最出名一定係海南雞髀飯。啖啖新鮮滑溜無骨嘅雞髀肉,配上雞湯、特製辣椒醬同埋甜醬,簡直令人垂涎三尺。特製辣椒醬好野味,比青咖喱汁還要辣,所以要慎點。 雖然少爺只試食了一件雞髀肉,但已經決定下次一定要試海南雞髀飯。唔知大家有無留意飯嘅顏色呢?左邊一半飯係黃色,而另一半係白色。 海南雞髀飯 兩種唔同飯味道,盡在一個外賣盒之內,都只係五十蚊澳門幣。响出面澳門餐廳食飯,都要咁上下價錢啦!仲有,大家要分清楚海南雞飯同海南雞髀飯,係兩款唔同嘅飯。 海南雞髀飯比海南雞飯要貴五蚊,但好多人一入去都係叫雞髀飯。仲要同老板娘好強烈咁強調話係要雞髀飯,大家都好怕比錯咗海南雞飯。可想而知,海南雞髀飯嘅魔力係十分巨大。 總結黎講,泰友麵雖然唔係咩高級餐廳,但十分注重衛生。斬雞廚師會帶上手套,環境都好乾淨。老闆娘講野雖然大聲,但十分温柔體貼。有顧客向佢投訴上次比錯飯,佢都肯作出補償,咁好嘅態度可以去邊度揾? 泰友麵大部分嘅飯都係五十蚊左右,價格算係中等,所以好多附近街坊都會黎幫襯支持。假如大家無無聊聊唔知去邊度揾食的話,不如試試連勝街嘅泰友麵,包您一定滿意。 延伸閱讀: 【澳門必試甜品】是柑香茶?是蛋糕?必試連勝街 Baptiste Brichon 的柑香茶法式蛋糕 傳說級稀有度!《怪物彈珠》X《刀劍神域》紀念限量版桐人二刀流手機殼 【澳門手搖界傳奇】大排長龍!沐白黑糖波霸鮮奶可以有幾好飲? 【澳門必影美景】不可錯過的浪漫!最愛夕陽下的澳門旅遊塔