最新文章

【真 ‧ 玩雪】澳門首個!戶外飄雪嘉年華

節慶盛事
Cheers!・2018-02-23

想感受滿天飄雪的夢幻冬日,終於唔使搭飛機喇!事關澳門國際嘉年華協會在旅遊塔戶外廣場舉辦了「澳門美食之都飄雪迎新歲」活動,將旅遊塔的戶外廣場打造成一個落真雪的「飄雪世界」,大人細路都啱玩! 4 米高冰雪滑梯 要數場內的重頭戲,一定是兩條高達 4 米的冰雪滑梯,小編從最高點滑下來大概只需 5 秒,超有快感!而在「飄雪世界」更可砌砌雪人、玩雪玩具及來個雪球遊戲!不得不提,場內還會定時出現飄雪,營造出濃厚節日氣氛。 4 米高的冰雪滑梯雖然唔算長,但勝在夠快,超刺激! 「飄雪世界」提供多款玩雪玩具。 每條冰雪滑梯只可容納一人,小編是個危險示範,觀眾切勿模仿。 小朋友至愛賽車場 最受小朋友歡迎的還有「嬉戲洋洋」遊樂區,區內準備了多架電動車,讓小朋友學習做一個安全駕駛者。而「史努比雪的世界」就有個 1.5 米高的雪人,記得擺上 Instagram 呃 Like 啦! 史努比迷記得去呢個以史努比為主題的攤位。 現場還有「飄雪留影區」讓大家盡情拍照;「福來美食坊」就售賣各款美食,讓大家大快朵頤;還有一個「吉祥如意坊」,讓大家寫下新年願望。活動直至 3 月 4 日,快啲把握機會去玩啦! 澳門美食之都飄雪迎新歲 地點:澳門旅遊塔戶外廣場 費用:MOP 20 日期:即日起至 3 月 4 日 開放時間:11:00 – 22:00

星級化妝師 Maza 教路!新年必學桃花妝

節慶盛事
Cheers!・2018-02-14

各位 Sis 新一年想催旺姻緣和人緣,除了擺個桃花陣,更可從妝容入手。今次小編就素顏上陣做 Model,更請來專業化妝師 Maza,教大家化個甜美桃花妝,以充滿光澤感的底妝配搭磚紅色調的眼影,塑造出平易近人的好氣場,狗年自然桃花「汪汪」啦! 化妝步驟: Step 1 底妝 以具有光澤感的 Base 打底後再上粉底。 變靚小貼士 ► 冬天天氣比較乾燥,如果粉底唔夠潤,可混入少量精華液,令底妝更滋潤貼服,達到零撠粉效果! ► 粉底可重點放在 T-zone 及眼周附近,避免臉頰的粉底沾污衣領,妝感亦更自然、亮麗。 ► 重覆拍打濕粉以代替遮瑕膏,令底妝效果更輕薄。 Step 2 修容 以淺色修容膏打亮眼肚及 T-zone 位置,再以深色修容膏於下巴輪廓處輕拍,令面型更加立體。 變靚小貼士 ► 亞洲人的眼肚位置通常較凹陷,只要打亮眼肚位置,五官就立體得多。 Step 3 定妝 取少量蜜粉,輕拍於兩頰。 變靚小貼士 ► 先於兩頰拍上蜜粉,完妝後視乎其他部位的出油情況,再決定是否需要上蜜粉。 Step 4 畫眉 先梳順眉毛,再以貼近髮色的眉粉由眼尾處向眼頭方向上粉,最後順應眉毛的生長方向塗上眉 Gel。 變靚小貼士 ► 選擇貼近髮色的眉粉,宜淺不宜深。 ► 眉毛稀疏的 Sis,則可選擇較深色的眉粉塑形,再上眉 Gel。 Step 5 眼妝 打好眼影 Base 後先在睫毛出處至高於眼線的位置刷上 Amber 色眼影,再以深啡色眼影於睫毛出處畫上眼線,然後黏上一束束的假眼捷毛,眼妝就大功告成。 變靚小貼士 ► 以深啡色眼影代替眼線,營造出漸層的效果;眼妝更自然,男友實鍾意! ► 將假眼捷毛黏在眼皮的中間位置(約 5 - 8 束),眼型更圓,人緣自然更旺。 ► 片裝假眼捷毛容易影響眼型,建議使用一束束的假眼捷毛。 Step 6 胭脂 以較眼影淺色的胭脂掃在蘋果肌上,打造出白裡透紅的感覺。 變靚小貼士 ► 因為眼影較深,所以選擇較淺色的胭脂,以免妝感太濃。 Step 7 唇妝 先上自然色唇彩,再上唇膏,咬唇妝即成。 變靚小貼士 ► 唇膏應由內塗向外。 ► 使用自然色唇彩代替潤唇膏,豐唇效果更顯著。 人緣桃花妝完成! 結語: 完妝後,小編最欣賞炯炯有神的眼妝,因為 Maza 將假眼睫毛放在眼皮的中段,令雙眼看起來更大更圓,配搭咬唇妝和白裡透紅的好氣息,連同事都話:「你今日講八婆嘢都有仙氣。」 化妝用品: Base ▬▶ Guerlain Météorites Perles Foundation ▬▶ GIORGIO ARMANI Sculpting ▬▶ MAKE UP FOR EVER Contouring ▬▶ Vidi Vici Eye Shadow ▬▶ HUDA BEAUTY Blush ▬▶ LA MER Brow Powder ▬▶ KRYOLAN Lip Balm ▬▶ KRYOLAN & ESTÉE LAUDER Highlighting ▬▶ TARTE 了解 Maza 更多:https://goo.gl/fB4ZDB

【澳門文華東方酒店】新年限定下午茶 Tea Set

節慶盛事
Cheers!・2018-02-14

農曆新年每日都陪屋企人飲茶、食中菜,確實有點膩。不如趁一盅兩件和盆菜年飯的中間,約埋好姊妹去 High Tea 啦!「澳門文華東方酒店」就趁新年推出賀年特色下午茶,每件糕點既精緻又有意頭,影相打卡特別有氣氛啊! 三層架囊括四款鹹點和五款甜點,統統融入農曆新年元素,例如「黑椒牛肉三文治配干邑芥末」就特別用上干邑入饌,三文治充滿酒香,加上半生熟牛肉的煙韌口感和清新芥末味,層次感可想而知。 「黑椒牛肉三文治配干邑芥末」口感非常豐富。 而小編至愛的是「茉莉花及橘子馬卡龍」及「伯爵瑞士卷」,前者入口時先湧出清新茉莉花香,繼而橘子味道徐徐滲出,甜而不膩;而瑞士卷的「塔頂」就非常滑溜,而且伯爵茶味非常濃厚,配搭下層的戚風蛋糕,啖啖豐富口感。至於鹹點方面,「鱘龍魚籽及蟹肉慕絲三文治」就至得我心,師傅以唔同顏色及大小的花形麵包墊底,再鋪上蟹肉和鱘龍魚籽,鮮甜又 Juicy! 「鱘龍魚籽及蟹肉慕絲三文治」鮮甜又 Juicy。 不得不提,酒店的「大堂酒廊」經過兩個月的大規模工程,最近以新裝示人。酒廊入口率先迎來由捷克 LASVIT 玻璃設計公司設計的玻璃屏風裝置「水波」,中庭又有由新興馬來西亞華裔藝術家康怡以一個月時間創作的大型荷花畫作「興盛」。計我話邊歎 Tea 邊睇藝術品,都咪話唔寫意。 「水波」由 118 件手吹水晶玻璃和有機氣泡組成,創作靈感源自自於流動的海水。 「興盛」以丙烯顏料製作出超過一萬朵小花嵌砌一幅大型荷花畫作,令人目不暇給。(酒店圖片) 大堂酒廊賀年特色下午茶 價錢:MOP 448 / 兩位(MOP 728 包括香檳兩杯) 日期:2 月 15 至 3 月 2 日 時間:1400 – 1800 酒店資訊:澳門文華東方酒店

【2017年回顧】LifeMag文章大集合,今年您錯過的精彩文章。

節慶盛事
Chrysalids 少爺・2017-12-31

2017 年來到最後一天,少爺想整一整理今年所寫過的 LifeMag 文章。所以,少爺用了些少時間,趕及今日內把 2017 年所寫過的 LifeMag 文章集中在一篇 LifeMag 文章內,令 CyberCTM LifeMag 讀者更加容易閱讀到今年少爺所寫過的文章。其實少爺亦想藉此來個回顧和檢討,希望明年 2018 年能夠為各位寫出更多有水準的 LifeMag 文章。以下就是少爺今年在 CyberCTM LifeMag 內發表過的文章,不計算入本篇的話,一共有 27 篇。 七 月 份 LifeMag 文 章 相信大家都知道壞蛋獎門人3已經上映左有一段時間,筆者上上星期日趁放假都有去澳門大會堂度睇呢套戲。 詳細介紹:犀利哥想憑壞蛋3就想做奧斯卡影帝?!問左迷你兵團未呀? 每年暑假,澳門人都會抽時間帶小朋友、同老友、同知己、或者係同另一半出外散下心,增廣見聞,大買特買。今日筆者將會為你介紹日本,因為筆者上個月先至去完,所以想分享一下親身經驗。 詳細介紹:想挑戰下自己心臟嘅極限?快d飛去台場 JOyPoLiS 玩餐勁啦! 澳門人多車多,好多駕車人士為求方便快捷而違反交通規則,就會收到 “牛肉乾”。今朝返工時,見到位駕電單車的人士逆駛左大約一個轉彎位,剛剛就是從我的面前轉了出去。 詳細介紹:無人見到你違規就唔洗食 “牛肉乾” ? 蜘蛛俠同鐵甲奇俠不但是筆者極喜愛的 Marvel 人物,而且他們都是聰明絕頂的男人。不同的地方有好多,例如一位要靠打兼職賣相片黎賺錢,另一位則是靠賣軍火起家的億萬富豪; 詳細介紹:兩個「愛恩斯坦」,等於幾多個「諸葛亮」呢? 現今科技發達,小朋友年紀細細就已經開始接觸手機平板電腦,玩的遊戲都是以電子遊戲為多。筆者相信再過多幾年,懷舊類型的玩具就會逐漸被人遺忘,甚至絕跡。今日筆者會介紹幾款當找不到其他人一起玩的時候,也可以自己一個人玩的玩具,下次會介紹一些適合幾個朋友仔一齊玩的遊戲。 詳細介紹:那些年,我們曾經一起玩過的玩具。 唔知大家對尋日來也匆匆,去也匆匆嘅颱風「洛克」有甚麼睇法呢?係米都希望「洛克」可以黎遲一日?定還是好彩只係落左一朝雨,下晝可以出街玩? 詳細介紹:短暫停留澳門的颱風 「洛克」 相信大家都知道近排有好多夏日活動等住大家去參加,但又唔知幾時開始,又或者唔知邊啲地方啱自己去,有見及此,筆者今日稍為介紹一下今個暑假澳門會有咩活動帶比大家啦! 詳細介紹:「懶人包」澳門夏日活動精選必睇攻略~ 星期六嘅早上,天氣十分晴朗及炎熱,相信大部份人都應該仲嘆緊冷氣訓緊覺。而筆者就選擇早起身,去練車場度練電單車。 詳細介紹:想有一雙古銅色嘅手臂?咁就要揀朝早練電單車~ 八 月 份 LifeMag 文 章 好多時候我地都會用一個甚至係幾個唔同嘅表情符號 (Emoji) 配搭黎回覆訊息,可能係因為忙,又或者係想表現得有型啲 cool 啲等等原因。但每一次用 Emoji 嘅時候,你會唔會煩用邊一個先至啱或者夠 chok 呢? 詳細介紹:你今日揀啱要 Send 嘅 Emoji 未呢? 相信大家都有玩過 Super Mario 嘅 Gameboy 版,亦都有玩過瑪利歐賽車 Super Mario Kart,所以都應該認識晒所有遊戲角色啦,但唔知大家知唔知《瑪利歐 + 瘋狂兔子 王國之戰》將會於今個月29號有得出售呢? 詳細介紹:今個月尾有得玩《瑪利歐 + 瘋狂兔子 王國之戰》啦!準備好你部 NINTENDO SWITCH 未? 「天鴿」昨天到訪,澳門氣象局早上九點才掛八號風球,足足比鄰近的香港遲了大約三小時才掛。 詳細介紹:不能忘記的「天鴿」 「天鴿」雖只造訪澳門幾個小時,卻留下不少破壞。所有訪澳的旅客,只要經過婆仔屋,都一定會影的葡國雞,也倒下了。 詳細介紹:風災過後的澳門 「天鴿」過後,葡國雞公仔倒下也無可厚非,畢竟「天鴿」風力十分驚人,就連馮前局長也低估了它的威力。在筆者還以為會有人把它修復之際, 詳細介紹:婆仔屋的「葡國雞」公仔倒下了! 九 月 份 LifeMag 文 章 今年澳門立法會選舉投票將於2017年9月17日上午9時至晚上9時。選民投票時一定要攜帶澳門永久性居民身份證到所屬的投票站投票,如不清楚自己要去那個投票站,可以透過以下方式查詢。 詳細介紹:2017 年第6屆澳門立法會選舉投票程序及注意事項 適逢颱風「天鴿」吹襲,導致人命傷亡及財物損失,所以筆者相信今年的投票踴躍程度一定會比以往幾屆為高。今年也有相當多組別出來參加選舉,令合資格投票的選民多了很多選擇。多選擇是好,但票只得一張,應該投給那一組才是最好的呢? 詳細介紹:【2017澳門立法會選舉】仲未想到投票給那一個立法會候選組別? 農曆八月十五,即2017年10月4日,就是中國傳統節日中秋節的日子。除了觀賞又大又明亮的月亮外,還會玩燈籠、食湯圓、月餅、柚子等等應節食物,以求團圓之意。 詳細介紹:【中秋節系列】既可愛又實用的柚皮燈籠 禮拜日下晝悶悶地,筆者妹妹就買咗印尼特式糕點返黎食。由於數量有限,所以筆者只能揀其中兩款試食。最後揀咗薯仔馬介休球同埋豆撈黎試。 詳細介紹:口痕痕想食特式小食?試試美丹印尼小食店啦! 十 月 份 LifeMag 文 章 近排睇咗某個 Blogger 嘅騎呢零食開箱之後,就決心要揾番樣似樣嘅騎呢零食分享下,實行騎呢鬥騎呢。剛剛有同事去完台灣旅行帶番黎手信,於是急不及待試了這款名為「鹹蛋麥芽餅」。 詳細介紹:既騎呢,又創新的一口「鹹蛋麥芽餅」 筆者仲記得以前細細個都會去大利豬扒包對面的單車舖租單車踩,亦都係學識踩單車嘅地方,依家當然唔同晒。時代進步,賭權開放,租單車嘅地方已經變晒做食肆,大利豬扒包亦都搬走到附近(雖然只係轉個彎左右)。今次同大家介紹頂替大利豬扒包位置嘅新地方﹣﹣青洲灶記咖啡。 詳細介紹:食黎食去都係豬扒包同葡撻,不如試間新野﹣﹣青洲灶記咖啡 今晚七點鐘,第二十屆「葡韻嘉年華」就會係氹仔龍環葡韻正式開幕。「葡韻嘉年華」創始於一九九八年,當年舉辦的目的是慶祝六月十日的“葡僑日”,以表揚在澳門居住、就業及對本澳發展作出貢獻的葡語人士。今年活動主要圍繞住食同玩兩大方向。 詳細介紹:「葡韻嘉年華」今晚七點鐘開始啦,仲可以試玩模擬賽車添! 澳門每年11月左右都會舉辦格蘭披治大賽車,所以交通道路會左封右改,好容易就會出現大塞車的情況。係大賽車裹面,旗號係十分重要。 詳細介紹:第64屆澳門格蘭披治大賽車系列﹣﹣認識旗號知多D 今日開始至星期日 (10月29日),都會有不同類型的慶祝節目。但重頭戲會落係今個星期六 (10月28日) 的媽祖祭典儀式!除此之外,當日亦都係農曆九月初九「重陽節」,是登高的好日子呢!當日整天都會有非常緊湊的慶祝活動等着大家黎參加,歡迎大家黎參加! 詳細介紹:仲記得連「天鴿」都難傷分毫嘅「媽祖」嗎? 既然大家覺得夠膽睇的話,我都唔會阻止大家。一年一度萬聖節又黎啦!仁慈堂婆仔屋每年都會舉辦與萬聖節相關的活動,今年都唔例外!今朝經過婆仔屋,已經開始有人佈置萬聖節裝飾品。於是趁無咩人,即刻入去影番一兩打相。好,先奉上無咁恐佈嘅相畀大家熱下身先。 詳細介紹:【慎入!恐佈+多圖+劇透】仁慈堂婆仔屋萬聖節活動 十 一 月 份 LifeMag 文 章 上次筆者已經介紹了不同顏色的旗號,它們所代表的意思及賽車手應要注意的事項。今次就介紹大賽車的主角,無它就無可能有大賽車這一回事,它就是「東望洋跑道」。 詳細介紹: 第64屆澳門格蘭披治大賽車系列﹣﹣大賽車跑道知多D 一講起11月份澳門有咩節目,大慨九成人都會話係「澳門格蘭披治大賽車」。但除咗大賽車之外,澳門仲有好多其他活動,包你分身乏術。例如啱啱過咗嘅星期六同日就有遊艇、飛機同汽車展覽。而黎緊星期六同日就會有澳門美食節! 詳細介紹:澳門美食節今日開幕啦!您準備好食好野未呢? 筆者搭咗咁耐巴士,耐唔耐都會見有到交通意外已經發生咗。今朝返工坐巴士途中,就見到亞馬喇前地已經發生咗交通意外。 詳細介紹:係澳門揸車,小心係唔夠嘅! 十 二 月 份 LifeMag 文 章 近排少爺揾到間賣法式甜品嘅店舖,名為 Baptiste Brichon Pâtisserie。甜品賣相滿分,甜品樣靚可愛不在話下,味道亦十分唔錯,尤其是企鵝。當然,一分錢一分貨,價錢亦相對比較高,每款甜品都是賣 45 澳門幣。 詳細介紹:可愛到爆燈的 Baptiste Brichon Pâtisserie 聖誕節甜品 假如您閱讀到這裏的話, 少爺可以告訴您, 已經無彩蛋了,已經無彩蛋了,已經無彩蛋了。 因為很重要,所以要講三次 XD 祝願大家 2018 年事事順利! ~以及感謝大家能夠閱讀到這個位置~ 【2017年回顧】LifeMag文章大集合,今年您錯過的精彩文章。 題外話:上圖內有5幅圖是重複的,有興趣的朋友不妨把這5幅找出來,不過無獎品亦無獎金 =P

女士福利文!大賽車型男特集

節慶盛事
Cheers!・2017-11-23

每年「澳門格蘭披治大賽車」嘅焦點,都放喺一班身材火辣嘅賽車女郎身上,風頭幾乎大過各項賽事嘅冠軍得主。今次小編就反其道而行,為各位 sis 謀福利,特別整理出一篇「大賽車型男特集」。除咗幾位「風一樣」嘅靚仔車手,仲有迷倒萬千少女大媽嘅賽車男模,即刻睇相慢慢欣賞啦。 CTM 已經連續第 15 年冠名贊助「CTM 澳門房車賽」,除咗搵嚟賽車女郎,亦係少有選用賽車男模嘅公司。繼上年笑容甜美嘅外籍孖仔,今年更請來韓籍美男子 Gwon Sik 和 Hwa Seok ,兩位 Oppa 出場即「秒殺」唔少記憶體! 「澳門格蘭披治大賽車」嘅焦點又點止一班又索又性感嘅賽車女郎? Oppa 一出場,場內女士歡喜若狂! CTM是少有選用男Model的公司,引來傳媒爭相報導。(網上圖片) 場外俊男美女爭奇鬥艷,場內亦雲集來自世界各地嘅型男車手。重點是年輕外國選手佔大半數,比賽場內小鮮肉縱橫!!! 現年30歲,別號「澳門先生」的莫他拿(Edoardo Mortara)就算載上頭盔,幾乎遮蓋全臉,仍然擋不住其超然魅力!( 圖片取自澳門格蘭披治大賽車官網) 最後莫他拿以不足一秒時間力壓亞軍富林斯,第4次捧走GT世界盃,成為全場焦點。 英國車手伊洛特(Callum Ilott)排位賽得第一名,但決賽時因戰車故障,無緣奪冠,可惜! 專注的男人最性感。 即使除下車手服,結實肌肉仍然若隱若現。 下期預告!《大賽車番外篇──Sailormoon戰車之愛情故事》 撇開車手與模特兒,場內戰車同樣是鏡頭焦點。今年首次參加「CTM澳門房車賽」嘅澳門車手 Delfim 就以非常吸睛嘅 Sailormoon 戰車出賽,小編同當事人做咗個專訪,先發現一切都是因為愛……

澳門美食節今日開幕啦!您準備好食好野未呢?

節慶盛事
Chrysalids 少爺・2017-11-10

一講起11月份澳門有咩節目, 大慨九成人都會話係「澳門格蘭披治大賽車」。 但除咗大賽車之外, 澳門仲有好多其他活動,包你分身乏術。 例如啱啱過咗嘅星期六同日就有遊艇、飛機同汽車展覽。 而黎緊星期六同日就會有澳門美食節! 由「澳門餐飲業聯合商會」主辦嘅「第十七屆澳門美食節」, 聽日就會開幕啦!到時一定會人山人海。 今年同往年一樣, 地點依舊都係澳門觀光塔前地嘅「澳門西灣湖廣場」舉行。 時間由11月10號至26號, 週一至四下午5時至晚上11時, 週五至日下午3時至晚上12時。 每年美食節都會搜羅本地,以及海外的特色美食。 今年嘅主題係「發現美食新煮意」,糅合「美食航海」嘅元素, 邀請市民及旅客一齊從本土傳統美食中揾更多新奇有趣的餐飲、廚藝創意, 為市民同埋旅客締造一個與別不同、樂而忘返的繽紛嘉年華。 今年美食節依舊會設有中式美食街、亞洲美食街、歐陸美食街、風味美食街、甜品街等多個美食區, 合共150個美食攤位。展現澳門獨有的多元飲食文化。 美食節其間更安排一系列嘅精彩表演節目, 包括:少數民族歌舞、流行曲及懷舊金曲獻唱、舞蹈、魔術、武術表演等, 除咗表演之外,仲有啤酒競飲大賽及主題之夜,簡直就係令人目不暇給。 今年更加邀請日本著名餐飲美食隊伍,一共26家商號黎到澳門, 為西灣湖廣場下層打造令所有巿民同旅客都十分期待嘅「日本村」。 美食節現場會有日本傳統表演及極具娛樂性、禮品豐富的攤位遊戲,包你樂而忘返。 交通方面更加唔需要擔心, 巴士公司為方便巿民及旅客, 特別安排了四條免費穿梭巴士路線,特別要注意服務時間同上落車地點。 路線詳情: 一:南灣國際銀行 / 蘇亞利斯博士大馬路47號與羅保博士街交界 ←→ 澳門西灣湖廣場 二:黑沙環華僑永亨銀行/馬場海邊馬路32號 ←→ 澳門西灣湖廣場 三:氹仔中央公園 / 基馬拉斯大馬路 ←→ 澳門西灣湖廣場 四:關閘廣場 (關閘邊境大樓入境處左側) ←→ 澳門西灣湖廣場 服務時間: 星期一至四 下午5時至晚上11時30分 星期五至日 下午3時至晚上12時30分 唔想等巴士的話,可以由觀光塔步行,途經南灣湖,到巿中心或亞馬喇前地搭巴士。 既可以幫助消化,又可以欣賞澳門美麗嘅南灣湖夜景,一舉兩得。 交通問題解決咗,就到咗怕無得上網,同朋友開心 share 同打卡。 呢層大可放心,CTM 設有免費Wi-Fi熱點, 只要打開手機Wi-Fi搜尋CTM Wi-Fi網絡, 按下登入就可立刻享用60分鐘的免費CTM Wi-Fi服務, 有甚麼好吃好玩的,都可以立刻跟朋友們分享啦! 上網同交通問題都輕鬆解決咗,到咗最後難題,就係畀錢問題。 美食節免費入場。 現場設有售票處, 消費支持三大支付方式:閃付卡、銀聯二維碼支付及由大會統一印刷的現金券。 大會與中國銀行合作推出中銀閃付卡, 閃付卡預設儲值額為澳門幣300元,可現場增值。 售票處還設有閃付卡購買及增值專道。 美食節現場各攤位設有刷卡機,拍卡消費,卡內金額也可隨時於其他支持銀聯閃付卡的場所使用。 銀聯二維碼支付 美食節各攤位均設有獨立的二維碼。持有國內銀聯支付的客戶可以通過自己的智能手機,使用支持銀聯二維碼支付的APP,通過「掃一掃」功能即可完成支付。 此外!客戶憑中銀電子錢包卡,或銀聯錢包二維碼,於第17屆澳門美食節場內任何攤位單筆消費滿澳門幣50元尊享澳門幣5元立減優惠。(優惠數量有限,送完即止) 現金代用券 顧客亦可於現場售票處購買現金代用券,到各攤位選購食品。 大會統一印製MOP$5、MOP$10、MOP$20、MOP$30及MOP$50面額現金代用券, 另設有MOP$100及MOP$200套票於售票處發售。 顧客凡購買$100現金代用券套票, 可獲大會送贈MOP$5遊戲優惠券1張 (適用於攤位遊戲); 購買MOP$200送贈MOP$5遊戲優惠券2張,如此類推。 詳細資料可以到美食節 Facebook專頁:澳門美食節 Macau Food Festival 及 www.uafbmm.org.mo 。 最後如果想要免費代金券,可以到 CyberCTM Facebook 專頁 https://www.facebook.com/Cyberctm.Macau/ 了解。

【慎入!恐佈+多圖+劇透】仁慈堂婆仔屋萬聖節活動

節慶盛事
Chrysalids 少爺・2017-10-27

既然大家覺得夠膽睇的話,我都唔會阻止大家。 一年一度萬聖節又黎啦! 仁慈堂婆仔屋每年都會舉辦與萬聖節相關的活動,今年都唔例外! 今朝經過婆仔屋,已經開始有人佈置萬聖節裝飾品。 於是趁無咩人,即刻入去影番一兩打相。 好,先奉上無咁恐佈嘅相畀大家熱下身先。 周圍已經掛咗好多好得意嘅南瓜頭裝飾品 如果見到咁多南瓜頭都驚驚地, 又或者真係覺得唔太舒服, 就即刻禁 alt+F4或者右上角的紅色交叉。 如果有咩唔舒服搞到要入院,我唔負責嫁!無話我無警告+提醒啦! 以下係最後的忠告+提醒+警告 以下圖片涉及血腥、恐佈、驚嚇,可能會引起讀者不安, 如閣下睇完有咩頭暈身興搞到要入醫院,本作者一慨不會負責。 必須再強調一次,圖片內的裝飾品全部都是假的。 如果閣下係無咩膽,連曱甴四腳蛇都驚,咁我勸你唔好再拉落去睇啦! 又或者想保持神秘感,唔想被劇透的話,都可以離開! 假如你正用緊唔穩定嘅網絡,又或者無乜數據的話,都請離開,因為有超多圖片! 好!係時候去圖! ======================= 一入門口,就已經有位死神同兩個左右裝飾品「歡迎」大家。 「大家好!我係打錯左死神!」 「蝦佬!我係向右轉鬼神!」 「你兩條友扮咩死神鬼神呀?我先至係正宗死神!你兩個只係裝飾品黎咋!」 未入到去門口, 已經感到陰風陣陣,裹面充滿血腥、驚嚇、變態、虐待等等元素。 難怪無咩人係度。(其實係因為D人返晒工啫。) 周圍都放咗唔同嘅驚嚇裝飾品,蜘蛛裝飾品周圍都係,分分鐘會同真嘅混淆咗。 抬頭一望,好多蜘珠係頭頂。乜蜘蛛網唔係白色嫁咩? 有隻黑色大蜘蛛吊住落黎,稍有不慎,可能掂到都唔知。 有隻蜘蛛困住左係個井度?? 井嘅下面居然聽到人聲,係度話...... 「唉!好重呀!又要供呢樣,又要供個樣,揹到我成身債。早知就唔養小三啦!」 果然無論做人定做鬼都好辛苦。 另外有D可能因為仲未諗到放係邊,所以擺咗係一邊。 好多類似BB嘅公仔掛咗係枯枝上面 仲有好多其他的驚嚇裝飾品未準備好 咦?有塊白布包住嘅?莫非係...... 點知向下一望見到佢話:「殊......唔好嘈!你見我唔到!X3」 除咗死神公仔之外,仲有佢地「歡迎」大家。 相信男士都好想同最右邊嘅女士「合照」啦! 再行入些少,就會見到樹上擺左個無頭嘅女性公仔係樹上面。 旁邊有個焗爐,睇黎要開始煮野食啦! 轉個身,見到個浴缸,裹面放咗好多手腳殘肢,睇黎剛剛...... 擺放浴缸附近,好奇點解有木製輪椅,都無咩咁出奇。奇就奇在...... 張輪椅係米好普通呢?望下左邊中間位置...... 女士尖叫:「呀!!!係一隻老鼠呀!」 男士扮鎮定話:「唔洗驚!米奇老鼠D親戚黎啫。」 只係入咗婆仔屋中段左右,已經有咁多恐佈野,再黎聽到又有人係度話...... 「依家買間樓好貴呀,有個盒遮頭已經好好啦!」 真係陰公,死左都剩係得個盒?咁細應該叫做「劏盒」? 於是筆者決定再行入去多些少,見到有位少女同曬太陽男。 「救命呀!好曬呀!我對眼呀!」 「先生,同我影張相,好嗎?」 無問題,已經影咗你啦,仲 post 埋添! 大樹嘅附近亦都擺咗唔少野。 邊有人玩公仔玩到咁嫁?泰迪熊同白色熊灘係度 hea 緊。 旁邊有個阿伯坐係張椅同我講話...... 「無呀,我無偷懶呀!我諗住坐一陣,點知就變咗做一副白骨啦!」 呢匹莫非就係傳說中無頭騎士嘅坐騎? 係另一棵樹,筆者聽到有野係度尖叫。 原來有人係度曬茶葉「馬騮搣」?? 另一棵樹底下有隻被人用作實驗嘅狗? 「汪汪!汪汪汪!汪汪汪汪!」 (主人,你係邊?我要骨頭!) Sorry, 我骨頭太硬,唔會幾啱你食。 除左隻狗之外,仲有好多玩具頭放係樹底下。 好!終於都差唔多去到盡頭,行到最入面,就會見到佢。 「哈哈!你係米想去洗手間呀?入黎啦!無分男女廁嫁!」 呢個當然唔係洗手間啦!佢講笑啫。 旁邊又聽到有朋友係度講野,偷聽下先。 左:「好曬呀!晾衫邊係咁晾嫁?」 中:「米就係,衫都唔識晾!」 右:「其實......我生前都唔識晾衫。」 嘩,佢地太悶了吧,晾衫都好講。 最後壓軸登場嘅居然係呢位被人拉錯嘅仁兄? 「做咩攞孖葉鎖我呀?我有交稅嫁。」 睇到呢度,首先要恭喜大家成功克服所有恐懼。 希望今個星期六同日,大家可以抽時間參加由婆仔屋文創空間主辦嘅「第五屆婆仔屋萬聖節之夜」。 詳細活動資訊可以到佢地嘅 Facebook 網頁。大家到時記得要化好鬼妝黎嚇人啦! 《第五屆婆仔屋萬聖節之夜》 海報來源:https://www.facebook.com/AlbergueSCMMacau/ 日期:2017年10月28日及29日(星期六及星期日) 時間:晚上7時至10時30分 地點:婆仔屋文創空間 - 庭院 免費入場 以上資料及海報均來自:婆仔屋文創空間 Albergue SCM 圖片來源:Google Map 坐標:22.197425, 113.544399 地點:仁慈堂婆仔屋 地址:澳門瘋堂斜巷8號 巴士路線:M237社會工作局﹣7,8 M123東南小學﹣17 M270塔石體育館﹣2A,7,8,8A,9,9A,12,18,22,25,25X 巴士路線資料來源:澳門交通事務局 http://www.dsat.gov.mo/bus/

仲記得連「天鴿」都難傷分毫嘅「媽祖」嗎?

節慶盛事
Chrysalids 少爺・2017-10-26

一年一度的大型宗教盛事 「第十五屆澳門媽祖文化旅遊節」 今日開始啦! 今日開始至星期日 (10月29日),都會有不同類型的慶祝節目。但重頭戲會落係今個星期六 (10月28日) 的媽祖祭典儀式!除此之外,當日亦都係農曆九月初九「重陽節」,是登高的好日子呢!當日整天都會有非常緊湊的慶祝活動等着大家黎參加,歡迎大家黎參加! 好!事不宜遲,透露畀大家知當日會有點樣嘅行程。 首先當日早上十點至十一點,路環媽祖文化村天后宮將會舉行「開幕式暨媽祖祭典儀式」。然後當日下晝三點至五點,筷子基至祐漢街市公園一帶將會進行一系列的巡遊活動。活動期間會有巡遊隊伍,抬著媽祖神轎由筷子基出發,然後到達祐漢街市公園。晚上八點至十點,將會在祐漢街市公園舉行「廣西藝術團專場文藝晚會」。 你以為到咗十點就完?梗係未啦。仲有最後的壓軸戲,就係「澳門天后宮媽祖回鑾天后宮」。當日的晚上十點至十一點,會係祐漢街市公園出發,帶着媽祖像返回至媽祖文化村天后宮。整個行程就會到此結束。 早在2014年,澳門媽祖信俗成功被列入去《國家級非物質文化遺產代表性項目名錄》裹面。希望大家會約埋三五知己、姨媽姑姐、左鄰右里一齊參加澳門其中一個旅遊文化盛事﹣﹣「澳門媽祖文化旅遊節」啦! 【第十五屆澳門媽祖文化旅遊節】重點活動: 開幕式暨媽祖祭典儀式 地點:路環媽祖文化村天后宮時間:上午10時至11時 坐標:22.123025, 113.562659 筷子基進行巡遊活動 地點:筷子基至祐漢街市公園時間:下午3時至5時 廣西藝術團專場文藝晚會 地點:祐漢街市公園時間:晚上8時至10時 坐標:22.211056, 113.552300 澳門天后宮媽祖回鑾天后宮 地點:祐漢街市公園至媽祖文化村天后宮時間:晚上10時至11時 參考資料及部分圖片均來自: 感受澳門 Experience Macao:https://www.facebook.com/ExperienceMacao/ CyberCTM 澳門活動:https://calendar.cyberctm.com/

「葡韻嘉年華」今晚七點鐘開始啦,仲可以試玩模擬賽車添!

節慶盛事
Chrysalids 少爺・2017-10-19

今晚七點鐘,第二十屆「葡韻嘉年華」就會係氹仔龍環葡韻正式開幕。 「葡韻嘉年華」創始於一九九八年,當年舉辦的目的是慶祝六月十日的“葡僑日”,以表揚在澳門居住、就業及對本澳發展作出貢獻的葡語人士。 今年活動主要圍繞住食同玩兩大方向。 食,當然主要係食葡國菜啦!葡國餐廳會係午餐及晚餐時段,提供各式各樣的風味燒烤,以及不同葡語國家烹飪的特色美食。 玩,可以話係最重要嘅一環。每一年都會有電腦模擬「東望洋跑道的澳門大賽車」遊戲畀大人細路哥體驗一下無危險的賽車滋味,連保險都唔需要買。 唔想玩賽車?當然可以試玩其他充滿特色的葡國傳統遊戲啦!例如:爬竹竿、大腳八、扯大欖、跳麻包等。小朋友仲可以同小馬合照,或者到兒童遊戲區遊玩,仲可以落場比賽手動足球添。 除左食同玩之外,仲可以享受由嘉模電台全天候播放的葡語國家音樂。仲有由本地多隊葡語表演藝團送上多場截然不同風格的歌舞。 嘉模教堂前地,會有一個小舞台。多隊來自本地藝團將會係呢個小舞台上面表演輕音樂,載歌載舞,讓觀眾在悠閒的環境下一邊欣賞輕音樂,一邊品嚐葡式美食,一舉兩得。 十個來自安哥拉、巴西、佛得角、幾內亞比紹、果阿.達曼和第烏、莫桑比克、葡萄牙、聖多美和普林西比、澳門及東帝汶的居澳葡語社群在現場設置十個特色文化攤位,以展示他們國家或地區的音樂、相片、手工藝、特色服飾、文學書籍、地道小食及飲品等,讓參加者更深入了解本土濃厚的葡語文化。 一連四日的精彩活動,集歌舞、遊戲、美食、多國風情於一身,歡迎全澳市民和旅客一齊參加,一同體驗熱情洋溢的葡式風情!你豈能錯過呢? 【活動資訊】 主辦:澳門特別行政區文化局、中國與葡語國家經貿合作論壇常設秘書處協辦:澳門特別行政區旅遊局、民政總署 以上圖片及嘉年華節目表皆可到澳門文化局網頁 http://www.icm.gov.mo/ 詳細查閱。 坐標:22.153788, 113.559746 地點:氹仔龍環葡韻 地址:澳門海邊馬路 巴士路線:T315 氹仔 CEM 貨倉﹣15,21A,25,50,50X,56,72 T319 嘉模泳池﹣11,15,22,28A,30,33,34 時間:2017/10/19 (四) 7 p.m. - 10 p.m.2017/10/20(五) 7 p.m. -10 p.m.2017/10/21(六) 12 p.m. -11 p.m.2017/10/22(日) 12 p.m. -10 p.m. 圖片來源:Google Map