文章列表

靈擺育嬰法

生活在我城
覺醒媽 Awakening Motherhood・2018-09-06

個仔嘅成長步伐，真係有啲難跟得切。轉下眼5安奶又原來已經唔夠食，再轉下眼又原來已經發育到該得眼瞓都唔瞓覺。 我好想可以好勁咁話你知個仔一喊就知佢需要啲咩，但其實我真係唔係時常都連到線，尤其當一放工已經筋疲力盡嘅時候，佢喊，我淨係識得一齊喊去抒解下自己壓力。 拔，啱啱朋友仔發現咗新玩法。可以自製圖表嚟用靈擺check BB因咩事喊。 圖為小女子嘅作品。佢要奶嘴丫？要食嘢丫？要換片丫？要抱丫？要玩丫？還是其他玩法呢？ So far 佢指出嚟都準㗎喎。我擺佢係架玩具隔離，佢真係會指去「玩」嗰格！好得意 兩個鐘前食完奶，我噯到投曬降都唔得，就拎張紙出嚟畫咗個圖表，原來係又要食奶⋯⋯阿仔乜你個胃大得咁快⋯⋯ 今個星期五，有個同「高我」連結嘅靈擺工作坊，呢個玩法就係呢度嚟㗎喇！有興趣嘅媽媽，或者對連結高我有興趣嘅朋友，可以去呢度睇詳情：https://www.facebook.com/events/318197808951937/?ti=ia 覺醒B眨下眼又大咗好多喇

音叉哄睡法

生活在我城
覺醒媽 Awakening Motherhood・2018-08-24

之前上網睇過外國爸爸OM個女，一OM就止喊，我又試，唔OM由自可，一OM佢就⋯⋯喊⋯⋯OK，fine，呢招唔work，重諗住個阿媽咁身心靈，個仔唔多唔少都會受⋯⋯ 事隔一排，我走咗去學OM音叉，呢支叉係放鬆叉，啫嗰啲肌肉緊張呀，失眠呀（？！）用呢支叉可以好快搞掂。 又事隔一排，我發覺我個仔有黑眼圈，同埋會無啦啦喊。我就請我仔個守護天使幫下手啦，隔咗一排，我朋友無啦啦share咗篇文章，話原來BB唔夠瞓係會掙扎、食手手、fing頭，同埋更難入睡。 頂！我哋之前個概念係「日頭唔好畀佢瞓咁多，夜晚先有得瞓」原來係錯㗎！日頭瞓得夠，夜晚自然入睡！ 唔怪得我個仔有黑眼圈！又扭計，夜晚又扭咁耐先瞓！原來係唔夠瞓！ 我終於醒覺！佢一扭，我就攞走支OM音叉同佢做。開頭佢都係照掙扎，但十分鐘後，瞓著咗。 且～早知唔駛搞咁耐⋯⋯ 守護天使應該食住花生咁話：「正所謂，你學咗啲嘢係唔會無原因嘅。」 10分鐘內搞掂 之前搞咗幾耐⋯⋯

致全職媽媽的感謝狀

生活在我城
覺醒媽 Awakening Motherhood・2018-07-25

七月過得快到一個點，乜原來已經嚟到尾聲。當你重未準備好做人阿媽，眨下眼你就坐完月，再眨多下眼就，我個仔咁快就五個月大。 我熱愛我嘅工作，係我從來未有過咁具挑戰性同滿足感、快樂、喜悅和驚奇，叫我放棄工作全職湊仔，基本上係無可能。正式全力投入返Cator嘅工作之後，每日來回工作和家庭之間，當我對住個仔嘅時候，我感覺自己好僵硬。見住工人姐姐單兩下眼我個仔就笑到太陽咁款，點解我勁歌熱舞，我個仔都無乜反應嘅呢？ 潛入潛意識入面搵，我頂，原來我唔捨得個仔大得咁快。 潛意識嘅嘢係好神奇，佢可以幫你收埋自己個真實感受係入面，你意識上唔知道，但佢背後會影響住你，重要係好大力咁影響住你。 因為唔捨得個仔大得咁快，所以我做嘢時要花特別多能量去離開個仔去工作，返到屋企又唔想面對自己放棄咗mon實個仔長大嘅事實，所以成個人有一部份嘅能量block住咗。即使我勁歌熱舞疊羅漢，我啲energy都flow唔到去我個仔度，即使到都大打折扣，然後就每日都筋疲力盡又充滿挫敗感，但又唔知發生咩事，而家總算搵到答案喇。 同時，呢個都係比我經歷當年我媽媽嘅經歷。我媽媽當年忙到日日都工作到好夜先返屋企，我好掛住媽咪，重怪佢咁少時間陪我同哥哥。而家，我終於明白當年媽媽嘅感受喇。唔怪得媽媽叫我咪鬼做嘢留係屋企湊仔，原來係想我代佢填補當時嘅遺憾。 不過，當我意識到自己啲能量發生咩事，爆喊咗一鑊之後，我個僵硬就無咗，個仔對住我識笑喇。 抱歉啊媽媽，我都會同你一樣，成為一個全職媽媽。我相信只有我快樂，我體現到自己嘅價值，我心愛嘅兒子先至會學識快樂同體現自己嘅價值，將來成為一個快樂嘅人。 帶埋個仔返工係我嘅夢想，呢個夢想，我聽朝就會實現。晚安。 寫完於4:44AM（天使們，謝謝你哋一直以來嘅支持。） 好害怕當媽媽咩？眨下眼你就唔捨得個仔大得咁快㗎喇。

養豬育兒法

生活在我城
覺醒媽 Awakening Motherhood・2018-06-30

孩子剛出世的時候，壓力超級大。望住呢pat軟綿綿、又會郁啲就喊、全世界都當佢係寶嘅東西，「呢pat嘢照顧得唔好我就會比人鬧 、比全世界唾駡、放火燒死⋯⋯」作為一個正常人類，突然置身於一個咁嘅situation，唔焦慮就假。 佢真係軟綿綿㗎大佬，每次餵奶、換片、換衫、沖涼，甚至抱起佢，都好驚整斷佢條頸，你千祈唔好郁呀，好驚跌咗你落地！千祈唔好喊呀，一喊就被人覺得我照顧得你唔好。老公想去抱下個仔啫，我就抓狂驚佢粗魯得濟整斷個仔條頸⋯⋯ 打開Facebook，又跌個仔落電梯、又唔可以奶睡、又濕疹、又行開一陣就唔知點樣就變咗小天使⋯⋯千祈唔好唔喊呀，我寧願你有咩就喊等我去救你⋯⋯ 當啲人一見到我個仔話「哎吔你個仔好得意呀！」、「哎吔你個仔好聰明呀！」諸如此類嘅讚美，我只能夠苦笑，因為每一句都係壓力嘅來源。背負住咁大壓力，我對住佢真係笑唔出，即使係佢身邊出現都心驚膽顫，甚至驚到好想同佢保持距離。 呢個時候，有個朋友／三個孩子的爸，送咗一句比我：「小朋友生命力好強㗎，當佢好似豬咁養*⋯⋯」 我：「！！！！！！！」 簡直震撼了一百億人口。因為呢句說話，我嘅壓力指數由100跌到落60！然後慢慢先至明白，我當時係幾咁唔信任生命，唔信生命嘅力量，唔信生命本身。我覺得一切都係「我」，覺得生命由「我」去支配，無信任其他共同照顧者，忘記咗有更高嘅力量係我哋背後睇住我哋。 頂，而家我對住個仔笑得出喇，Ungoo！ *註：我無真係當個仔豬咁養，佢係食奶同用尿片㗎。 *再註：喂個個人唔同，有幾鬆幾緊大家自己覺察返點去到BB同你點樣健康快樂地共生啦。 翻我白眼⋯⋯我明⋯⋯睇開啲啦⋯⋯我都係第一次做媽媽啫⋯⋯

寶寶你累了

生活在我城
覺醒媽 Awakening Motherhood・2018-06-21

寶寶好鍾意見人，周圍派心心畀人，自從寶寶條頸比較硬淨之後，我哋就開始帶佢去街街。 寶寶仍然好細個，一日要瞓好多個鐘，但出到街，佢就掛住周圍望同派心心，太多干擾佢好難瞓得著。到佢終於斷電瞓著咗嘅時候，如果係佢未瞓夠情況之下有嘢整醒佢，佢會爆喊，喊得好陰功。 尋日父親節帶佢去街街去成日，夜晚返到嚟整醒咗就喊到收唔到聲，喊得好委屈啊。 「噯～陰功豬呀～咁攰重瞓唔到呀～係咪好辛苦呢？」 平時噯一陣畀支奶佢就好快平伏，尋日攰到佢爆喊到奶都唔飲係咁喊。呢個時候，我望住佢突擊「Ungoo!」寶寶呆咗，我見機再升級「UNGOO!」寶寶開始笑喇！ 寶寶一開始笑我就即刻隊支奶佢飲，飲飲下佢眼皮又越嚟越重，就瞓著咗喇～ 其實我哋大人都係咁，通常躁底時狂爆人鬧嗰堆內容其實都唔係真正核心。核心好可能就係「我好累」，就係有一大堆疲倦、壓力、情緒困住自己，抽唔返個人出嚟。需要有人明白自己、噯下自己、叫停自己，同自己轉變下心情，然後食個好味飯、沖個涼之後，就可以好好瞓一覺，第二日又一條好漢。 去街街累到吃手手，仍然要周圍望。

我想為你唱一首歌

生活在我城
覺醒媽 Awakening Motherhood・2018-06-18

我想為你唱一首歌，去表達我對你全部的愛。 但我找不到那首歌。 喉嚨有能量卡著，媽媽必須向你表達，望著你那巨大的幸福感。 也很想在你潛意識中，注入媽媽陪伴你，深愛你的感覺。讓這個旋律化成祝福，伴隨你一生。 即使將來你長大，去到天涯海角。 無計可施之下，我只可以哼歌，那來自我心深處的旋律，去釋放那無盡的感覺。 兒子，我愛你。媽媽從未試過愛一個人愛得這麼深，深得媽媽也害怕。 原來我可以愛得這麼深。 謝謝你，讓我體驗這充滿力量的感覺。 無論如何，請你記得我愛你。

抑鬱生存小貼士

生活在我城
覺醒媽 Awakening Motherhood・2018-06-15

上一篇講完我點好返法，呢篇講下我點樣係試出呢啲方法之前，馬景濤同木面表情之中令自己生活得似返個人啲。 1. 我的小太陽我個仔係我當時唯一溫暖到我嘅嘢，其他任何嘢對我嚟講都感覺唔到，係Facebook曬仔確係有減壓功效。有效就做，唔好同我講咩曬仔唔好，乜乜物物，我就嚟命都無，我要搵嘢吊住我條命緊要啲！ 2. 珍珠奶茶當時我食任何嘢都無乜味道，但爬台灣媽媽群文有話鮮奶茶有助催奶，我心裏面就燃起咗對鮮珍奶嘅渴望！亦都因為呢杯珍奶，每日引到我行出屋企去買同埋坐係公園曬一陣太陽。 3. 認咗佢我好到六分嘅時候我請朋友嚟我屋企比我曬仔，我都有好坦白咁承認我有產後抑鬱。當時雖然好到六成，但個狀態睇落去重係霉嘅。抑鬱時霉係好正常嘅事，如果你諗住你瞞得過，只會增加自己心裏面嘅負擔。 4. 見吓人抑鬱時真係好霉好唔想見人，又唔想照鏡見到自己嘅。生完身體未恢復嗰種面青青，同埋好無神彩嘅自己。但見人係真係會幫到你嘅原因係，你嘅生命需要流動，能量需要流動。見親人，見朋友都有幫助。畀佢哋畀支持你，比佢哋關心你，但就唔好迫自己見唔係太熟或者擔心人哋點睇你嘅朋友親戚，呢啲見一見又加大自己個壓力。 5. 向有能力嘅朋友求助初期我其實係無向人求助，開頭諗住荷爾蒙過咗之後就好返，又想自己拆掂佢，但拆到後來拆唔掂，就諗住開始扇啲風聲出嚟。但我又口硬，無正式向人求救⋯⋯但要有心理準備，唔係個個朋友都有能力應付你嘅抑鬱，有啲朋友可能好愛你，但見到你霉到咁，只識得喺你隔離喊埋一份。或者有啲朋友會急不及待搵個醫生比你，但其實你又唔想去睇，佢又會繼續迫你，又係會爆煲嘅。要搵啲經歷過風浪嘅朋友會比較好，佢哋至少識聽你講嘢，同埋比到安全感你。有咗呢啲力量去滋養之後，就會比較安心去繼續搵辦法處理嗰個抑鬱。 6. 唔好限制任何方法每個人條路都唔同，無公式。我自己嗰條都係試出嚟，A唔得就試B，B唔得就試C，意志！有嗰個一定要好返嘅意志不斷試！有呢個意志就一定會好返！ 抑鬱嗰段時間，成個instagram都係我個仔同埋我個仔。

產後抑鬱點好返

生活在我城
覺醒媽 Awakening Motherhood・2018-06-14

產後抑鬱係真係好需要家人嘅支持，但除咗借助外力，最重要係自己要有好返嘅意志！ 我能夠一個月內好返，其實係因為當時心裡OS：「你又話你嗰啲嘢（身心靈）幫到人，咁你又抑鬱？.......」。唔得，呢單嘢真係好瘀皮，我一！定！要！好！返！用盡任何我用到嘅方法！我都要快啲好返！ 雖然我上面感曬嘆號咁好似好勁，但其實當時我個狀態係馬景濤咁嘅（請重溫《點解上天要畀產後抑鬱我》配圖）。 當時抑鬱嘅程度係唔輕嘅，輕生嘅念頭係每日都出嚟巡一巡，但論牌面，我衣食無憂，老公又鍚我，照顧寶寶又有工人同媽媽雙重呵護，個仔重要超級超級超級可愛，理論上係唔「應該」有抑鬱，但係抑鬱係真係同外在條件無太大關係。 好！我就用盡我所識嘅方去處理我嘅抑鬱！ 1. 聆聽情緒背後訊息前文講過，第一樣嚟嘅係躁鬱，咁開頭未知就爆我老公爆到周圍都係。咁躁鬱嘅時候，再一次提提大家，千祈唔好以為「佢有病」就忍咗佢諗住忍過咗嗰期就算。我的確係有嘢委屈咗自己好耐，以寶寶同大家最大利益的話，我嘅改變，係真係有需要嘅。 2. 讓情緒出來抑鬱就係因為壓抑太耐，情緒係能量，你越壓住能量，佢越會亂咁唧，想喊就喊啦，但想鬧人就睇下有冇得唔好鬧得咁應，有冇啲易入口嘅方法去解決佢先，如果真係無，我會鼓勵你爆。嗱咁你自己就住爆，唔好釀成家暴諸如此類。 3. 負自己嘅責任好似我嗰啲委屈，其實除咗老公有份食住上之外，我都要攞返自己個責任，我唔夠尊重自己嘅感覺同意願，對自己無信心，怕失去，所以一直死忍去委屈自己。 4. 嘗試理解對方雖然你真係好偉大咁用條命生咗個人出嚟，你身體上嘅痛同創傷係好大，但如果你認真睇下隔離嗰個老公，佢見住你做場咁勁嘅大龍鳳出嚟，自己又乜都做唔到，其實都幾焦慮嘅。男人嘅嘢，重要通常有脆弱位都唔肯拎出嚟，仲要通常用另一種情緒去遮住，例如用憤怒去遮住內疚，甚至有時佢哋都唔會知自己原來係遮緊一啲自己嘅情緒。但我知，你已經馬景濤咁嘅樣仲要你去理解對方係唔容易嘅，但都係嗰句，意志！試！ 5. 要處理嘅就真係要處理我當時係hold唔住咁核爆我老公（多謝你咁都無放棄我嗚⋯⋯）爆曬啲委屈出嚟之後老公又好好咁作出改變，當時已經由十分躁鬱跌到六分抑鬱，好咗好多好多，所以需要改變嘅就必須要行動。重有六分我都要搞掂佢！ 6. 求助上面嗰啲自己可處理可嘗試嘅都做咗喇， 重會有無端端流眼淚同埋有唔想生存嘅念頭出現，我就知道一定重係有啲更深層次嘅嘢，我自己一個解決不了。於是我做咗幾次家庭系統排列，搵到我抑鬱嘅基調。原來係關於我同我原生家庭嘅一啲未被意識到嘅拉力，甚至係一啲關於我胎兒時期嘅想法，因為有呢啲想法而唔比自己得到幸福（？！）。係呀，其實好多人都唔比自己過得幸福㗎，你無見過人生得靚靚女女但偏偏就係賤人磁石，好多時都係因為一啲原生家庭嘅拉力，而令到佢哋唔畀自己幸福。 當我連結返我嘅母系祖先，我嘅父母，我決定比自己幸福同好好照顧自己之後，我嘅產後抑鬱就同我講byebye，我好似浴火重生咁返番嚟！之前嗰啲無端端流眼淚同輕生嘅念頭無咗，重覺得呢個世界係充滿愛。我最記得係，當我返到屋企見到我老公，佢送咗份生日禮物比我（如圖），我望住份禮物流眼淚。但今次係開心嘅眼淚，我感覺到我老公好愛我！我收到呢份禮物好感動！！！最搞笑嘅係，當時去衛生局檢查產後情況，有份產後抑鬱問卷比我填，我填完個姑娘為之震驚，話「嘩，你個狀態好好喎！」我話「係呀～」笑一笑，撥一撥頭髮就走出衛生局。 媽！我得咗喇！！！！！！ 我重生之後，我覺得自己充滿力量。我決定唔再委屈自己，坦誠去同屋企人溝通。我唔要比自己再次跌返入抑鬱裡面！同埋，我決定要用自己嘅經歷去協助需要協助嘅朋友。 蒲咗啲媽媽群咁耐，我係好驚訝於，點解群入面無人提過自己有產後抑鬱嘅呢？唔通我真係咁特別？但搵返資料原來病發率係好高㗎喎，十個有六個有，仲要有四個係抑鬱半年以上，甚至自此長期食藥。 希望我嘅經歷可以幫到有需要嘅媽媽或者抑鬱嘅朋友。如果有需要嘅，請聯絡我哋Cator，睇下有咩可以幫到手，唔好怕羞。 catorcentre@gmail.com 適逢生日，老公送咗呢條鏈比我，話係我同仔仔。「咁你呢？」「我係包住你哋嗰個心心。」我即時喊到豬頭咁，我終於都再次感受到我老公愛我喇！

人情百日宴

生活在我城
覺醒媽 Awakening Motherhood・2018-06-10

搞百日宴其中一個環節係「能量交換」，即係我哋比啲咩賓客，賓客又比啲咩我哋。當我重係度諗緊「蝦～啲人情夠唔夠cover張單呢？」，我老公就同我講要同阿仔開個戶口儲起佢。 我震驚了！原來我之前一直都聽唔明佢之前話個百日宴為仔擺嘅意思，佢嘅意思除咗嬰兒發佈會同設宴接受大家對寶寶嘅祝福之餘，收到嘅禮物都全部比曬寶寶。佢話「等佢第時大個出身嘅時候有得start up⋯⋯」。我啲人情概念重停留係結婚階段，覺得係收返成本，而家有小朋友，啲能量真係要往下流，唔再只係專注喺自己度喇。 上文講到我老公係凡人，唔會明白驚世鉅作，查實，佢先至唔係一個凡人，佢真係一個識得無條件咁愛嘅超級爸爸。 感謝各界對寶寶的祝福

百日宴曬仔曬自己

生活在我城
覺醒媽 Awakening Motherhood・2018-06-08

百日宴圓滿結束，寶寶終於食飽奶安睡了。喺宴會裡面，見住阿仔好似比人傳波仔咁傳法，做媽媽嘅係肉赤嘅。但我同時驚訝我個仔竟然傳足咁耐都無喊，重係我懷裡小急叉一陣之後，又笑曬咁，寶寶嘅生命力真係好強好純粹。 百日宴嘅嘢，坐月時已經考慮緊搞唔搞好，唔搞係因為本身我好怕人多嘅場合嘅，能量好混亂，去完人多場合會感覺好深層嘅內在枯乾。同時咁多長輩在場，枯乾咗又怕招呼唔到，壓力係呢度。選擇搞，係因為我個仔實在太得意，我好想同大家分享我嘅喜悅。同埋，我仔係鍾意見人嘅小甜心嚟嘅。 一個家族最重要嘅係後續有人，傳宗接代係人類生存嘅天性，新生命誕生係家族裡面嘅大喜訊，百日宴事實上係一個新聞發佈會，係一個家庭裡面最重要嘅新聞發佈時刻。同時，一百日係媽媽產後復出見人嘅一次隆重時刻，係媽媽經歷過死過翻生嘅重生，身體恢復好，係好值得慶祝嘅。 百日宴係一個有慶祝意義的宴會，我見過有媽媽朋友百日宴時完全無打扮過咁出嚟，個BB就好似公主咁隆重登場。當時個心痛咗一下。媽媽們，請你好好愛自己。將全副心機擺曬落仔女度，仔女係唔會開心。小朋友食「過度犧牲牌」嘅奶長大，即使小朋友長大成人，心裏面會有自卑同內疚。慶祝你自己死過翻生，慶祝你自己重獲新生吧，慶祝你喜獲來自上天嘅禮物吧。 百日宴雖然係慶祝，但我都係簡單搞，就咁印咗一塊掛畫，同埋造咗幾個人形攬枕（？！）。靈感來源係，抱住我個仔係我感覺過最美好嘅事，所以我特別整咗幾個人形攬枕比大家一齊分享。我老公開頭話唔好，話宴會拎出嚟太古怪，但驚世嘅創作凡人又點會明白呢？喺我創作魂嘅推動下，我靜雞雞做咗出嚟，老公見到實物笑到碌係度，重自己攞嚟玩咗好耐...... 攬枕拎到去百日宴大成功，大家都同假寶寶玩得好開心！又可以傳少啲我個仔，又有我個仔比大家玩，多謝各位！飲多杯！ 假寶寶：招呼唔到，飲多杯～ Photo Credit: Wendy Wong

點解上天要畀產後抑鬱我

生活在我城
覺醒媽 Awakening Motherhood・2018-05-31

我咁鍾意問上天問題，我當然有問點解要畀我有產後抑鬱啦，咪睇我而家笑笑口咁講，我問嗰時個狀態係好似馬景濤咁仰天長嘯「點解～～～」，咁上天又真係有比到答案我喎～ 我嘅產後抑鬱，係由躁鬱開始。我嘅核爆級憤怒，係將之前嘅生活方式來一次大摧毀，然後重新建立最適合自己同寶寶嘅生活環境。我之前有幾咁唔顧自己感受，有幾多嘢忍住唔出聲，去就住老公同其他人，怕其他人唔愛自己，今次焗住大核爆之後，就無得再忍再委屈。之前懶委屈驚人哋唔鍾意自己，咁爆一爆之後，且～原來佢哋唔會走㗎，爆完之後關係仲好咗，老公識關心返多啲自己。 我之前忍得咁辛苦，躁鬱就將之前儲埋嗰啲能量一嘢爆返出嚟。爆乾淨之後又點呢？開始depress... 個人無表情，食嘢無味，個頭好似有嘢罩住自己，即使老公捉住我隻手話好愛我都感受唔到。好，點解！！！ 抑鬱嘅經歷，係畀我抑鬱完之後更識得珍惜有感覺嘅美好，等我抑鬱完出返嚟唔好再返番去以前嘅模式。以前嘅模式係抑壓自己真正所想所需，抑鬱就係「你咁鍾意抑壓自己感受，就比你感受下抑壓到盡係點啦」，就係好似喪屍咁，笑又笑唔出，又無乜感覺，又無啦啦唔知點解想喊。 我哋每個人嘅生命係有目的而來，當我哋活出自己就會好開心，上天都會幫你。但活唔出我哋嘅目的，去錯路徑就自然會出問題。我哋忍受住一啲嘢就係違反自己本來應該順應嘅道路，就會唔開心囉。另外，有過創傷又無面對嘅，都係忍住咗一啲嘢，咁生命能量又係會受阻塞。 好喇，講完點解要抑鬱，下次講我點好返。 「點解要我產後抑鬱～～～～～」

坐月母夜叉

生活在我城
覺醒媽 Awakening Motherhood・2018-05-26

生完正常三日出院，但因為我個傷口比較大（我個仔出世時成8磅幾）同埋有血腫，再加上我本身比較敏感，我生完頭兩日都痛到重未落到床。姑娘見我咁嘅環境就建議我留多日，但我老公用佢史力加貓嘅亮晶晶眼去期待我同寶寶早日出院，我就心軟。「好啦，返到屋企都係瞓床㗎啫⋯⋯」點知，咁就領嘢⋯⋯ 出院返屋企嗰程痛就預咗，以為捱到返屋企上到床就係終點，上到床我先至體驗到我嘅天真。喺醫院一日三餐都有人照顧，寶寶餵奶換片又有人教同搞掂，我需要做嘅就係將寶寶個嘴仔對正我乳頭，同埋將自己個嘴仔對正羹飯，其他嘢就會自動發生。但返到屋企雖然有工人同月子餐，但都要有指令啲嘢先至會發生，夜晚無工人老公第二日又要返工。我仰天長嘯：「點解～～～～點解上天要設計到初生嬰兒三個鐘頭食一次奶～～～～～～！」我問上天問題，總是會得到回應。 終於，返屋企第五日，我喺休息唔夠、對住初生嬰兒嘅焦慮同忍受身體痛楚，再加上我老公（佢係西人，我唔係鬧佢，佢真係一個西人）毫無坐月嘅概念唔識體諒之下，我崩潰了。我心裏面嘅憤怒好似一個個原子彈咁爆出嚟，所有我委屈的、不順眼的、新的、舊的問題一次過爆出來，我當時覺得甚麼也沒所謂了，我要毀滅一切。我歇斯底里咁鬧人，係屋企入面尖叫。首當其衝領嘢嘅，當然係我老公⋯⋯ 「我為咗你早咗一日出院！」呢句係我心裏面忍咗五日嘅說話。但係其實明明早咗一日出院咁大把啫，點解個憤怒可以變成原子彈嘅級數呢？ 我之前一直都委屈自己，我明明好痛都要為咗老公而早出院。這一直是我和其他人相處的模式，總是以其他人優先而委屈自己。漸漸地，當你嘅委屈自己變成習以為常，唔好咁傻以為啲嘢下下忍到過到骨就算。能量嘅嘢要還㗎。 問題徵結在於，我怎麼從來不愛自己？不顧自己感受，終於釀成今次大核爆呢？（我真係好鍾意問點解） 然而，今次大核爆將之前所有委屈都迫我表達出來了，老公終於知道和接收到了。那條委屈的list很長！我將之前的所有委屈都攤出來，我老公真係好好，我所爆的他都有聽，然後協商。今天協商完第二天我又突然醒起之前委屈了什麼，我就whatsapp我老公鬧一條水蛇春咁長的訊息，當時他每天的lunch break都奉獻了在回應我的核爆之上。直至第三個禮拜我嘅委屈都爆完了...... 我以為只是同老公積存太多委屈要表達所以先搞成咁，但爆到第二個禮拜，我已經發現月子餐啲味唔同咗，原來係抑鬱令到我無胃口。再到爆乾淨曬啲委屈之後，我心情低落，沮喪。 蝦，無理由㗎喎，老公都順攤曬啦，應該大團圓結局先係，點解仲咁心情低落呢？終於我肯聽我老公講，開始留意產後抑鬱係咩嚟...... 問咗咁多個問題，下回分解。 坐月時身體弱又唔夠瞓病咗幾次，圖中條毛巾係用嚟接住我退燒時狂流嘅汗。

我從產後抑鬱裡重生了

生活在我城
覺醒媽 Awakening Motherhood・2018-05-11

人最怕的不是死，而是半生不死。抑鬱是活折磨，當時每日都有一段時間無故流淚，而恆常的狀態是沮喪。非常沮喪。 面無表情，頭的四周像有一層濃霧罩住自己。食物沒有味道，只知道要吃飯而感受不到飽餓。即使老公和我說「我愛你，我在這裡支持你」，我兩顆眼淚滴下來告訴他，「我感受不到。我覺得你好像在叫口號。」我覺得很孤立無援，很自卑。我覺得，我的生命在逐漸消失。 是的，之前你讀的部份覺醒媽文章，是我在產後抑鬱時所寫的。很感謝這個平台，寫覺醒媽的文章時，能讓我專注在文字裡面，暫時忘記沮喪。很感謝Cator的編輯，她鼓勵我繼續寫，在抑鬱裡其實是很難集中精神的，但有編輯做我後盾，讓我寫得很安心。而寶寶是我的小陽光，靠在睡著的他身傍，親他的臉珠，是我生存的意志。 現在我很感恩抑鬱這份禮物，他迫使我面對我自己心靈最深處的問題。這一次，我非改變不可了。一直以來，我忽略自己的感受，時常要為別人做什麼，必須貢獻點什麼。見到身邊的人開心，我才鬆一口氣。但，如果別人選擇要保持不開心呢？如果別人選擇留在悲劇裡呢？ 經歷過抑鬱，我才明白，原來我的人生之前大部份都在輕微的抑鬱狀態裡。我從來沒有善待自己，我沒有照顧好自己的身體和感受。 我回來了，我的整個生命回來了。以後我不會再委屈自己了，當我一委屈自己，那個抑鬱的感覺又想要跑出來。夠了，我抑鬱夠了。我以後要活得快樂。 母親節快樂，是我的選擇。下次再講我點行出嚟。 正在用彩油46號，漂泊者。嗯，就是那個孤立無援的我啊。我從這裡重生了。

寶寶愛我嗎？

生活在我城
覺醒媽 Awakening Motherhood・2018-05-06

對著我的初生寶寶，基本上他和動物一樣，沒有說話的能力，每天只是吃奶、屙、睡覺。每次他醒著的時候，或者我們的互動，都是我在服務他。咁辛苦三更半夜起身餵奶，忍臭換屎片，他愛我嗎？他真的知道我愛他嗎？ 作為動物傳心師，其中最熱門（不是之一）的問題，一定是「動物愛我嗎？」我當年就是其中一個問這個問題的動物家長。 我之前一直覺得我的貓貓都比較喜歡我老公，對於我，我只是同屋住的另一個人。覺得她會嗲我，都是因為在索求食物，或者老公不在家才退而求其次...... 當我知道我的貓貓很愛我之後，我和她的關係起了戲劇性的轉變。我開始看見她對我的愛，看見她有多愛我。至於她愛我還是我老公多，已經不再重要了。 而我的寶寶，在我肚裡面的時候我已經知道他很愛我。但在照顧他的時候、壓力大的時候，還是不禁會問，「他愛我嗎？」甚至寶寶第一次望住我放心心咁笑，唔夠瞓的我都會不禁懷疑，那個笑是他喜歡我？還是我有咩咁好笑呢？ 在這裡，我可以告訴大家，無論是你家裡的寵物，還是你的初生寶寶，他們都一定很愛很愛你。他們愛你的程度，甚至多於你愛他們。他們對你的愛，是無條件的愛。因為，每個靈魂最原本的狀態，都是充滿愛。我們或動物們投身到地球，都是帶著愛而來。 「無條件的愛」的意思是，他們愛你不是因為你餵奶或給貓糧，不是因為你有幾及時為他換屎片。他愛你，是因為你是他媽媽，就是這麼純粹。即使你換片換遲咗，「暗」極佢都喊到拆天，那個喊到拆天的寶寶仍然是很愛很愛你。只是肚餓或其他需要，讓他們只可以用哭的方式告訴你。 反而，我們活到這把年紀，已經忘了如何無條件地去愛。社會教我們要叻、要乖、要競爭、要聰明醒目才值得成功，才有價值。做父母就很容易跌入這個恐懼模式去對待自己的小孩，因為擔心自己的小孩將來在社會沒有競爭力，就同佢講「你乖／叻／醒先至抵鍚」。然而事實是，我們即使幾令爸爸媽媽嘔血，爸爸媽媽仍然會愛你。只是他們的頭腦會告訴他們，「要這樣對他們才會xxxx」⋯⋯ 大人都活在口是心非之中。寶寶和小動物，就不會這麼扭擰。 而家我已經話咗比你知寶寶同小動物好愛你，而家你可以試下帶住呢個假設去同佢哋相處。歡迎feedback返畀我，期待你嘅好消息。 Feedback可以去呢度feed：catorcentre@gmail.com 時常對我瘋狂放心心的寶寶

湊BB唔係一個人嘅事

生活在我城
覺醒媽 Awakening Motherhood・2018-04-30

尋日自己做咗個好簡單但好有力量嘅排列。由於我係新手媽媽嘅關係，BB喊總係會不知所措，甚至開始驚單獨面對BB，驚自己搞佢唔掂。 尋日排咗BB同自己、BB同老公嘅關係，原來BB係好愛我，代表我個仔嘅代表重感覺到原來BB知道我好愛佢，知道佢瞓覺嘅時候我會望住佢（哎好冧）。我之前覺得湊BB淆底，好驚佢喊我會唔識處理，又覺得老公好粗線條會整親BB。其實湊BB唔係一個人嘅事，係需要人支持。我之前以為老公搞唔掂BB，排出嚟原來BB係咁愛爸爸同埋感覺咁安全。 而家排完之後對住BB嘅壓力大減，見到老公抱住BB，我感覺由心裡面幸福出嚟～哈哈哈～（尷尬笑） 5月5我哋有個家庭系統排列工作坊，希望可以透過排列，讓更多人感受到愛再次流動嘅美好。詳情： https://www.facebook.com/events/594029350953681??ti=ia 老公成日做啲危險動作為娘表示擔心，但原來個仔覺得好正囉⋯⋯

覺醒媽 Awakening Motherhood

隨著覺醒的步伐，我們成為了母親，和孩子一起，來到地球學習愛。

歡迎收看祈祂中心（CATOR）專欄「覺醒媽 Awakening Motherhood」！

CATOR ＝ Cater + Creator

我們是提供服務的創造者，致力創造自己的命運，為客戶提供身心靈訊息、諮商及活動，藉著所提供的服務傳達愛，包括有家庭系統排列、天使咭解讀、靈性反應療癒、頌缽療癒等，協助大家找到自己的力量，做自己生命的主人。

歡迎預約諮詢或合作
 ☞  catorcentre@gmail.com
 ☞  www.facebook.com/CATORCENTRE

熱門推介

本網站使用Cookies來令您獲得最佳的瀏覽體驗。若繼續瀏覽此網站，即表示您同意我們使用您的Cookies。詳情請見我們的 Cookie 使用政策。