澳城餐飲

筆者仲記得以前細細個都會去大利豬扒包對面的單車舖租單車踩,

亦都係學識踩單車嘅地方,依家當然唔同晒。

時代進步,賭權開放,租單車嘅地方已經變晒做食肆,

大利豬扒包亦都搬走到附近(雖然只係轉個彎左右)。

今次同大家介紹頂替大利豬扒包位置嘅新地方﹣﹣青洲灶記咖啡。

以上圖片取自網絡,版權全歸拍攝者所有。 

 

由於筆者當晚去到已經接近晚上7點,好彩侍應仲肯幫我落單。

筆者點咗兩款小食外賣,一款係花生奶粒粒厚多士 (9粒),

另一款係10粒的炸魚蛋。

左邊:花生奶粒粒厚多士 (9粒)      右邊:炸魚蛋 (10粒)

 

先講比較普遍的炸魚蛋。魚蛋大大粒,有樣野一定要強調,

千祈唔好成粒「啪」落口

千祈唔好成粒「啪」落口

千祈唔好成粒「啪」落口

因為好重要,所以要講三次。

魚蛋真係好大粒,成粒啪落口,唔單止好難咬,分分鐘會出事。

千祈唔好成粒食,否則一定會後悔,XD 慢慢食就至享受!

 

泰式甜酸醬係附送,連埋魚蛋一齊點的確惹味,

只係無其它醬料選擇或配搭,覺得有些單調。

魚蛋質感好軟熟,比起街邊檔賣嘅普通冰鮮魚蛋,的確係好一點。

味道方面,十分平凡,同咖喱魚蛋嘅配搭差唔多,只係變左做甜酸醬炸魚蛋。

如果魚蛋加麵包糠一齊炸,食落去有種類似「食薯片」嘅聲音同感覺,會獨特好多。

再配其他唔同嘅醬汁,例如芥末、酸梅或乳酪味,產生唔同味覺變化會好好多。

10粒炸魚蛋=澳門幣38元,外賣加1元,貴唔貴就見人見智。

 

綜合黎講,我對炸魚蛋好失望,平平無奇,無驚喜,

只不過係咖喱魚蛋嘅放大版,而且38蚊10粒炸魚蛋真係唔多值得。

覺得一粒魚蛋三個八裹面,有兩個半係入咗去舖租裹面,

分分鐘得8毫子左右係食落肚,有機會再揀過一定唔會點呢樣。

 

另一款外賣小食,花生奶粒粒厚多士,比起炸魚蛋表現可謂好得多,

可以稱得上去到灶記一定要試。

先講個名,初頭畀「粒粒」一詞呃左,以為會又係一口小食系列。

但點知原來厚多士大大舊,一定要咬幾啖先食完一件。

雖然只係將麵包整成四方體黎炸,但炸得好體面,唔會話一度比較燶。

大大舊厚多士,配上花生奶,簡直係好味到爆晒燈。

 

咬感絕對係法蘭西多士嘅縮小版,「的的式式」,好好味。

配上甜到漏嘅花生奶一齊食,更加有一種幸福的感覺。

雖然外表有啲似炸豆卜或炸豆腐,但味道絕對係一流,

花生奶足夠有餘,唔會畀得太少,食完9件之後仲有得剩。

9粒花生奶粒粒厚多士=澳門幣30元,絕對值得一試。

 

總括黎講,花生奶粒粒厚多士可以用「可愛」黎形容,

講緊係個小食名改得好可愛,而唔係指外貌。

加埋花生奶食落去仲會有種開心+幸福+甜蜜嘅感覺,

絕對係失落或剛剛失戀嘅人士一定要食嘅一款小食。

 

灶記咖啡當然仲有其他好好食嘅小食,大家有機會黎到澳門一定要去試試,

而且交通方面,附近仲有官也街、龍環葡韻同星星花園,係打卡影相必到之處,

食飽飽之後仲可以行過去,幫助消化,一舉兩得。

坐標:22.152342,113.555336

地點:青洲灶記咖啡

地址:澳門巴波沙總督前地18號地下

巴士路線:T321氹仔中葡小學﹣11,15,22,28A,30,33,34

營業時間:7 a.m.至7 p.m.

圖片來源:Google Map

如需聯絡 Chrysalids 少爺,請寄電郵至 youngmasterchrysalids@gmail.com

 

 

[編輯聲明]

文章之內容版權均為作者所有,而CyberCTM僅獲得授權發表。