娛樂殿堂
犀利哥想憑壞蛋3就想做奧斯卡影帝？！問左迷你兵團未呀？
相信大家都知道壞蛋獎門人3已經上映左有一段時間，筆者上上星期日趁放假都有去澳門大會堂度睇呢套戲。
無論你係捧迷你兵團嘅場，定還是係想捧嘉嘉、迪迪和玲玲嘅場，甚至好似我咁係想睇下巴閉哥有咩新搞作，我覺得都值得一睇。但要注意，如果你無睇前兩套戲的話，或者可能會唔多明白當中的人物關係，係時候搵番頭兩輯温下習啦。
起初係電視睇電影預告時，以為巴閉哥會係犀利哥嘅新競爭對手加本片既大反派，但點知完全係兩回事。
入到戲院後，除左頭幾行嘅位之外，全場幾乎滿座，發現近八成左右都係家長趁小朋友放暑假帶去睇，所以院內充滿小朋友既笑聲同埋夾雜住 BB 仔既。。。喊聲。
首先，犀利哥今次簡直係訓晒身演出，睇黎佢係想爭奧斯卡影帝寶座，祝你成功。
其次就係迷你兵團，憑住無人明佢地up乜鬼嘅說話方式黎唱歌，相信如果真係去參加全美一叮，相信 Simon 哥都會忍唔住要㩒 Golden Buzzer。完全無排練過，即興嘅演出，完美嘅團隊合作，係呢套戲一定唔能夠錯過嘅時刻。
最後就係巴閉哥，一身白色服裝加金頭髮嘅造型，同犀利哥形成強烈嘅對比。其中兩兄弟一齊試金色跑車一幕最令到我難忘，因為架車真係好正好勁；仲有佢地兩兄弟入侵壞蛋巢穴，犀利哥點樣一路照顧住巴閉哥最令到我感到佢地嘅手足之情。
相信大家睇完呢套戲後，或者會有幾個疑問。其中一個筆者一路睇戲一路諗究竟邊個係哥哥，邊個係細佬？成熟啲嘅係哥哥？還是身高高啲嘅係哥哥？定還是無頭髮嘅先至係哥哥？因為粵語配音都係以 “兄弟” 黎做稱呼，所以根本無法確認。或者答案就係筆者錯過左嘅頭兩三分鐘裹面。
另一個值得想像嘅係如果當初犀利哥跟左佢爸爸，一個超級大壞蛋同埋研發者，相信犀利哥一定會 “前途無限”，“青出於藍勝於藍”，我諗到時警察都會幾頭痕。
結論係如果有追開壞蛋獎門人系列嘅人，不容錯過。
從未睇過壞蛋獎門人但係想睇迷你兵團嘅表現，更加要睇。
