娛樂殿堂

周末周日最好嘅消遣活動,

莫過於約埋朋友一齊去戲院睇電影。

一睇通常都會起碼用兩個鐘頭或以上,善用時間不二之選。

要數近期必睇嘅電影就當然有「玩轉極樂園」、「星球大戰﹣最後絕地武士」、「逃出魔幻紀3﹣叢林挑機」、「柏靈頓2」等。

其中少爺唔係星戰迷同埋無睇柏靈頓第一集嘅關係,

所以剩番「玩轉極樂園」同埋「逃出魔幻紀3﹣叢林挑機」可以揀。

又因為小數服從多數嘅無奈投票結果之下,少爺唯有要睇「玩轉極樂園」。

想睇「玩轉極樂園」嘅朋友要留意,

澳門只有兩間戲院有得睇,

一係澳門大會堂,一係就要去路氹澳門銀河UA戲院,

觀光塔無播呢套戲,兩張床,Two Bed。

相信眼利嘅朋友仔都見到海報嘅右下角,有隻叫小白嘅公仔係度。

無錯喇!頭廿二分鐘唔係播「玩轉極樂園」,而係播「魔雪奇緣﹣小白的任務」!

一張飛睇兩套戲,係米好抵呢?所以唔洗怕以為買錯飛或者去錯咗戲院。

少爺無睇電影預告,所以唔太清楚知成套戲係講D咩。

一開始以一個拋妻棄女嘅男人為開端,繼以阻止一個小男孩嘅夢想,

再以「千與千尋」嘅橋段進出亡靈之城,跟住就會出現類似「星夢傳奇」嘅比賽。

去到呢度,情節都大多都是以搞笑為主。

但之後就比較緊湊啦!因為會有近似「名偵探柯南」嘅推測橋段出現。

「誰是米哥嘅真正嘅太太爺呢?」

少爺覺得結局真係絕對有洋蔥眼濕濕嘅感覺。

當所有人都以為將要出現一個二選一嘅決定嘅時候,奇蹟出現啦!

想知係咩?當然要入戲院睇啦!

少爺最佩服嘅地方係畫 CoCo 太太婆嘅功力,畫得十分細膩。

雖然太太婆出場次數唔多,但絕無馬虎,條條皺紋都畫得好神似。

年紀老邁嘅感覺之餘,還帶有些可愛嘅感覺,尤其是個嘴。

大家睇戲嘅時候,不妨多D留意 CoCo 太太婆嘅動靜,非常得意。

其次係進出亡靈之城嘅連接位。

雖然只係剎那間,但畫得好靚。

如果應用係遊戲裹放出大招式嘅時候,效果應該會唔錯。

總括嚟講,如果想睇場戲打發時間,

但唔知睇咩戲,又唔想晒錢的話,

咁一定要揀睇「玩轉極樂園」!

包唔會晒錢又有好戲睇。

 

另外,如果有朋友會好似我咁,

睇完成套戲之後,會繼續留低睇下 Post Credit 之後有無幾秒短片的話,

可以慳番唔洗等啦,因為 Post Credit 之後係唔會有短片。

 

以上圖片均取自網絡。 

延伸閱讀:

爆澳門賭王兒子何猷君追奚梦瑶追到節目去:我吃醋了!

柳暗花明又一村

哈爾施塔特 . 高修湖 -- 初秋 . 奧地利 . 2017

出走廣州。品嚐正宗粵菜。愉粵軒 

如需聯絡 Chrysalids 少爺,請寄電郵至 youngmasterchrysalids@gmail.com

 

 

[編輯聲明]

文章之內容版權均為作者所有,而CyberCTM僅獲得授權發表。