澳城餐飲

引言亦懶得打了,如題。 

 

雄興軒美食

#潮州雞米

雞肉唔算超滑嫩,但湯底清甜有致,加上姐姐超友善服務態度,呢個 Lunch 一百分。

 

 

Wabi-Sabi 和陽小日

#慢煮烤牛肉定食

牛肉飯堆到成座山咁上檯,澎湃賣相成功擄走唔少記憶體,慢煮烤牛肉又嫩又多汁,惹味醬汁更加是拌飯聖物,加上加購嘅溫泉蛋,入口更濕潤。

 

 

SIP SOP SOUP

#半熟蜂蜜蛋糕

食過 SIP SOP SOUP 嘅半熟蜂蜜蛋糕,小女特意喺 Google 強大資料庫搜尋半熟之意。
得出最佳解答為:「就是麵粉用比較少,所以烤完之後,外皮是凝固的,但是裡面沒有凝固,這樣叫半熟蛋糕。」
而呢件半熟蜂蜜蛋糕,糕身比較黏口,充滿淡淡蜂蜜味,同時又帶蛋香,重點是丁丁流心嘅 Texture,口感過癮!

 

氹仔紅記飯店

#南乳雞翼

呢味「南乳雞翼」外皮薄而脆,一咬之下肉汁湧出,伴隨的南乳味又香又濃。即時想再訂位,邀請老豆與我再三品嚐。

 

 

新潮咖啡美食

#無骨雞翼

早前有位自稱「茶餐廳王子」嘅朋友向小女挑機,王子派出「新潮」嘅「無骨雞翼」向小女挑戰,雞翼入口啖啖肉,唔乾柴之餘亦唔油膩,內心即時響起「美味情緣」背景音樂。

 

 

華軒美食

#墨魚餅

被「茶餐廳王子」挑戰後,小妹派上戰場應戰嘅,就係「華軒」嘅「墨魚餅」,以自家打製嘅墨魚滑煎成餅,外表焦香、內裡煙韌又 Juicy。個人偏好配飯食,皆因可以選配白汁,鹹鹹甜甜,勁下飯啊!

 

公仔記

#豬手雲吞撈麵

豬手軟嫩入味、雲吞爽口彈牙,撈埋惹味咖哩醬,我又再次充滿力量。

 

 

更多美食推介:macausailormoon

傷餘座90後女子,新聞專科畢業。

立心成為人民喉舌,唯筆下墨水不著色政治時弊,只為世界美食及旅遊瑣事潑灑汁液。