愛情婚嫁
唔好以為愛埋你嘅缺點係必然
有一種人非常地自我中心，成日抱住「佢愛我就會愛我嘅全部啦」嘅心態去屈人硬食自己嘅缺點。呢種人情願花心機去執著於人地夠唔夠愛佢，多過去反省下自己有咩需要改進，持愛行兇就係呢種。
唔知幾時開始，呢個世界忽然多咗一種傳說係「真正愛你嘅人，會愛埋你嘅缺點，你只需要做番自己⋯⋯」，於是就畀啲自我中心嘅人利用做藉口，將自己唔好嘅嘢都變到理所當然。「佢識我嗰陣我已經係咁啦」「佢要改變我即係唔夠我愛啦」，聽落去好似好有道理，但其實一切都唔係理所當然。
係，一個愛你嘅人係應該要容納埋你嘅缺點，但佢可以包容，唔代表你唔需要去改。你可以任性地話要去做自己，繼續不思進取地保留自己最差嘅一面，但作為一個想你好嘅人，係好應該想你進步想你改善想你變得更好，而唔係縱容你一直任性一直自我。
有啲人會覺得「做自己」好有型，即係堅守自我、忠於自己，唔為任何人而妥協⋯⋯但呢度講嘅係堅持自己嘅信念，忠於自己嘅價值觀。而唔係死攬住自己嘅缺點唔放，唔肯改變，仲以此為榮？未免太幼稚。一個成熟嘅人自然會睇到自己嘅不足，想做得更好，正如一段成熟嘅愛情都係想大家都進步，兩個人一齊學習去改走壞習慣，去做一個更好嘅「我們」。
以上文章及圖片均轉載自網路，所有版權歸原作者所有
