gift 澳門生活誌

可愛到爆燈的 Baptiste Brichon Pâtisserie 聖誕節甜品

Chrysalids 少爺・2017-12-30

近排少爺揾到間賣法式甜品嘅店舖，名為 Baptiste Brichon Pâtisserie。甜品賣相滿分，甜品樣靚可愛不在話下，味道亦十分唔錯，尤其是企鵝。當然，一分錢一分貨，價錢亦相對比較高，每款甜品都是賣 45 澳門幣。 Baptiste Brichon 係老闆嘅姓名。老闆係法國人，不過望落有D似意大利人。雖然老闆望落比較Cool，其實都好 nice 嘅。因為12月最大嘅節日係聖誕節關係，所以推出咗一系列同聖誕節有關嘅法式甜品。先上全家幅，不過當日無買到聖誕樹。後尾先知原來要買一整套先至會包埋聖誕樹。唉，有些失落。首先介紹可愛甜品之一嘅雪人。Snowman 係由海綿蛋糕、日本富士蘋果果肉、白桃果凍、茉莉花茶慕絲、玉米片和薄脆餅乾整成。最好味係條頸巾，有種棉花糖嘅口感，不過其實應該係日本富士蘋果果肉。可愛程度只係僅僅比鹿低DD（可能輸係個鼻唔夠大 XD同埋又係得個頭）。其次，亦都係可愛甜品之二嘅聖誕老人。Santa Claus 嘅組成部分有紅絨毛海綿蛋糕、紅莓果醬、脆米片和黑朱古力忌廉。第三款要介紹嘅係鹿。Deer 係由朱古力曲奇海綿蛋糕、軟心朱古力再加薄片朱古力薄荷慕絲所整成。薄荷味十分濃郁。鹿嘅紅鼻子係馬卡龍黎嘅，可愛程度只僅次於企鵝（因為又畀甜品大廚斬首）。第四款係人人都想收到嘅禮物。少爺係個孝順仔，所以讓咗爸爸同媽媽試。Gift 裹面有柚子千層班㦸蛋糕、牛奶朱古力脆脆同埋伯爵紅茶慕絲。媽媽試完後讚不絕口，爸爸則一副無咩特別嘅樣子。第五款係一款頗為特別嘅甜品。將聖誕老人斬首已經夠晒慘慘豬，仲要賣埋頸以下嘅身軀。這款名為倒轉聖誕老人 Santa Claus Up Side Down 係用車厘子果肉海綿蛋糕、車厘子果凍、再加上香草煉奶慕絲和朱古力曲奇。係一個咁開心嘅聖誕節，居然要食聖誕老人落肚。腳同皮帶都係由朱古力所組成。可愛程度我簡直係無言，相反，恐佈程度真係好高。好！來到最後壓軸登場嘅呢款甜品係少爺心目中，無論賣相同味道都係遠遠超過 45 蚊嘅價值。假如你身上只有 45 蚊，又唔知買邊款甜品先至好，咁少爺一定推薦你買呢款甜品。包你賺超過45蚊。佢就係六款甜品之中最可愛，亦都係味道最無得彈嘅企鵝。 Penguin 係由黑朱古力海綿蛋糕、白朱古力慕絲及牛奶朱古力奶油夾心所組成。因為少爺係朱味力控，所以偏心就必然的。真係想食多次（可能係唯一一款甜品無畀廚師斬首XD）。因為依家已經過了聖誕節，所以聖誕系列法式甜品可能已經無再出，不過不妨碰下運氣。就算買唔到聖誕甜品，都可以見一見呢位靚仔嘅法國廚師啦！甜品材料資料來源： Baptiste Brichon Pâtisserie Facebook 專頁坐標：22.199267, 113.540903 地點：Baptiste Brichon Pâtisserie 地址：澳門連勝街4號益利大廈地下B座巴士路線：M201 白鴿巢前地﹣8A，18，18A，19，26 M124 白鴿巢總站﹣17 營業時間：12 p.m.至 8 p.m. 圖片來源：Google Map 延伸閱讀：既騎呢，又創新的一口「鹹蛋麥芽餅」口痕痕想食特式小食？試試美丹印尼小食店啦！食黎食去都係豬扒包同葡撻，不如試間新野﹣﹣青洲灶記咖啡

標籤：gift

【街頭訪問】恐怖情人節禮物？

可愛到爆燈的 Baptiste Brichon Pâtisserie 聖誕節甜品