【香港食記】 灣仔招積茶記 - 旺記冰室

Andrina ・2018-04-10

上次去完淺水灣，今次返返入市區食吓香港茶記先！ 講起香港茶記可能大家一定會去食華星、澳牛等等老地方；但其實新力軍嘅質量都唔輸蝕㗎，好似我呢日去咗灣仔開咗唔係好耐嘅「旺記冰室」，主打用日本雞蛋加4.3牛奶嘅滑蛋，而且入面只有中、午、下午茶套餐選擇，但係都吸引人排長龍食！！ 由於我11點去到，只可選擇早餐，未有機會試到佢最出名嘅滑蛋叉燒飯！ 招牌沙爹雞湯公仔麵配 鮮牛油多士及4.3牛奶日本滑蛋 沙爹雞湯公仔麵出乎意料好食呀！可能係用雞湯關係，唔似平時茶記一係淡過水、一係咸過龍，再加埋沙爹汁一齊食超好味！！！真心好少食到有內涵嘅公仔麵，所以推介！！！ 另外日本滑蛋呈半熟狀態，蛋香味十足，口感嫩滑！！！ 唔止呀，佢哋仲有旺記烘麥包三文治四重奏，勁足料！！ 午餐肉x雞蛋x花生醬x生菜 賣相好之餘，4樣食物都夾得到wo，不過午餐肉凍咗無咁好食!!! 後記：食早餐期間，廚房爆大聲播住90年代嘅廣東歌，軟硬、Beyond、王傑、彭玲統統都有，見到侍應有時都會不自覺唱埋一份，搞到我一路食一路唱，港味十足！！！ 餐廳：旺記冰室 Mon Kee Cafe電話：2528 2927地址：灣仔謝斐道142號建利大廈地舖 ------------------------------------------------------------------ 更多香港食記 高汁Hea點！香港淺水灣Limewood～ 深夜放毒～～～有性格嘅日式串燒店『肥後屋Fei4Hau6Uk1』！