想挑戰下自己心臟嘅極限？快d飛去台場 JOyPoLiS 玩餐勁啦！
Chrysalids 少爺 ・2017-07-11
每年暑假，澳門人都會抽時間帶小朋友、同老友、同知己、或者係同另一半出外散下心，增廣見聞，大買特買。 今日筆者將會為你介紹日本，因為筆者上個月先至去完，所以想分享一下親身經驗。 相信有好多人都已經去過日本呢個國家幾廿次以上，所以如果你係日本旅遊達人，或者你可以去睇下其他 Life Mag文章，以免浪費寶貴嘅時間。本篇只適合一d從來都未去過日本玩嘅朋友。 日本紙水依家都幾低下，筆者因為六月中左右要去東京玩，所以五月中至月尾左右時已經到中銀換定d日元，個陣時用港紙兌換都差唔多接近七算。今日再睇睇牌價已經跌至6.86左右，睇黎仲有得跌！（唉。。。可憐筆者d日元有排都無得放）所以大家如果今個月尾有時間可以不妨考慮下去東京、大阪或者去福岡度玩。 筆者未去過大阪，但聽有去過嘅同事話會建議去心齋橋同大阪城。 東京的話，上網隨隨便便揾都揾到好多好去處。其中一個筆者認為一定要去嘅係台場 Joypolis。你去完一定會慨嘆，點解我地唔係生活係木星上；咁嘅話，一日就唔會只係得廿四小時咁少。 如果你係後生仔喜歡挑戰玩勁刺激嘅機動遊戲，杜如風曾經介紹過嘅台場 Joypolis 一定係首選。玩完包你暈陀陀，玩到唔捨得走。怕暈浪嘅話可以玩下夾公仔，逛下街。喜歡闖恐佈鬼屋，呢度大把。全日無限次入場門票只需要4000日元，大約三百蚊港紙有找，超值。 筆者親身試過玩以下遊戲，因為有成八部機，而且得三關要闖，所以唔需要等太耐，反而最花時間嘅係要等職員姐姐逐一介紹完全部遊戲角色嘅名稱。 相信賽車遊戲都會係唔少男仔都必定會去挑戰嘅其中一款遊戲，筆者都唔例外。 可以揀剩係得自己一個人揸或者加個乘客陪同都可以，適合同朋友鬥番轉。 筆者揸過圖下白色嘅車，本身一路都被電腦架車拋開一大截，好彩最尾一個彎位僥倖地爬番頭，真係好險。 還有如果你係生化危機系列嘅粉絲的話，可以試試最頂樓嘅生化危機射擊遊戲，不過都要排好耐。 只要你肯花時間等同埋夠魄力的話，裹面仲有好多款遊戲等住你玩。 另外，唔想玩太刺激嘅野，只係想去影下相、買下野嘅，可以去 Joypolis 附近嘅商場，裹面有間 Legoland，非常適合一家人 “有小朋友” 入去玩。筆者還未有小朋友，所以有錢都無得入去玩。 今次先介紹台場 Joypolis，下次等筆者蓄夠錢去大阪時，再分享比大家。 澳門直航去日本東京暫時得澳門航空同長榮航空。上次因為筆者四月中左右已經訂定六月嘅機票，所以來回東京機票只需要兩千五左右就可以，超平。 單人來回日本東京機票價位可以查詢以下幾個網頁： 澳門航空 長榮航空
OHChance 旅遊誌 ・2016-07-15