搜尋澳門生活誌

幸村 - 榴槤馬介休

幸村・2023-07-05

落雨濕濕，大雨到雨衣都無效化，唯有泊好部老電，過隔離塔巴士返屋企。唔知係咪過咗高峰上落班時間，巴士就唔係好多人，上到車都有位坐，坐低咪安安樂樂打鋪機，理得佢幾大雨。甫坐低，就有一股奇異的飄香鑽入鼻孔，似榴槤加馬介休，心諗邊個會食得咁刁鑽？周圍望下揾揾那味道的源頭。原來係右前方，有一個翹腳的大叔，對鞋放係地上，那馬介休味道明顯從他「生醃」了一段時間的腳傳出黎。罪過！唔怪之巴士會無人，諗到呢度，孰不可忍，唯有落車，只怪小弟意志不夠堅強。日本每年都有組織調查最讓人討厭的乘搭電車行為，十年以來穩居榜首的是「讓人不悅的坐法」，坐到隔離都無位坐，或者翹腳，已經係最令人頂唔順的迷惑行為。唔俾翹腳係有啲嚴格，但阿叔當車箱係屋企咁脫鞋，已經算係突破了次元。第二是車箱裏大聲喧嘩說話，呢個相信大家都略有耳聞，日本搭車的確無人會大聲打電話，並不出奇。反而第三位「耳機大聲漏出聲音」，這就有點吹毛求疵，唔少人坐車就聽歌煲劇，估唔到發出了丁點聲音也構成了對其他人的騷擾。還有一項特別的迷惑行為，就是女性在車箱裏化妝，想不到也榜上有名，難道畫個眼線也騷擾到人嗎？百思之下，唯有諗到塗指甲油最合邏輯，令天拿水味充斥車箱，確係頗令人迷惑。老老實實，小弟咁大過還未見過有人會係巴士上塗指甲油，其實公共交通不影響到人只是很基本的公德。如果下次有調查採訪最讓人討厭的乘搭電車行為，我會提議不要帶榴槤馬介休上車。