生活在我城
端午節歷史
端午節就到啦，喺呢個節日裡，除咗會食粽同划龍舟呢一啲指定動作外，當然唔少得就係聽故事啦。端午節嘅由來相信大家都聽唔少，但相信大家最耳熟能詳嘅故事就係屈原投河喇。但除此之外，原來仲有伍子胥、孝女曹娥等等嘅事件薄，今日一於同大家上個歷史堂啦。
屈原投河
話說春秋時期，楚國有位名人，係當時楚國君主楚懷王嘅左右手，佢叫屈原，屈原個屈，屈原個原。事源呢位先生提出咗個“聯齊抗秦”嘅建議，結果搞到啲有錢佬唔太高興，兼夾聯名向楚懷王Complain，而呢個懷王真是將屈原革職，仲流放到沅、湘流域(唔好問邊到，自己查吓歷史書啦)，最後因為屈屈不得志，選擇投河自盡。當地居民好桑心，為咗唔好比啲魚魚咬食屈原嘅屍首，於是啲人就將準備好嘅飯團、雞蛋等等嘅食物丟入河中，再加以鼓聲嚇走啲魚魚。就是咁，個傳統就一直流傳到而家。
記念伍子胥
呢單野又係事源春秋時期，當時位叫伍子胥嘅楚國人，老豆呀哥都被楚平王所殺，極嬲，於是投靠咗吴國，最後吴國攻入楚國，主腳伍子胥掘墓將平王屍首狂鞭三百下，以報殺父殺兄之仇(其實聽落有啲變態)。後來吴王歸天，夫差上任，話時當時越國被吴國打輸咗，係手下敗將，伍子胥建議應該將越國連根拔起，但夫差死都唔聽，仲叫吳子胥自刎，佢死後，夫差仲命人將佢嘅屍首投入大江中，就是咁，端午節就出現喇﹗
記念孝女曹蛾
事件發生喺東漢時代，有位叫曹娥嘅14歲女仔，某一日，佢發現爸爸浸死咗喺江入面，於是佢不停喊，沿住江邊不停狂喊，終於過咗十七日後，佢都喺五月五日投江，五日後抱出爸爸嘅屍首。而呢件事被當時嘅政府官員知道咗，於是為佢立咗個碑。呢個故事係堅係假就不得而知喇，但曹娥之墓堅係存在，位置喺浙江紹興。
圖片來源：網上圖片
