澳城餐飲
Bar·Celona Tapas & Rice Spanish Gastro Bar
早前版主到訪過0既西班牙烤雞 (黑沙環分店),
原來佢隔離0既樓上舖,
都係佢地開設0既西班牙餐廳,
而主打0既係西班牙小食Tapas同埋酒類~~
從來無諗過會有一家咁不錯0既異國餐廳係黑沙環區出現!
意大利, 西班牙, 葡國菜等..
一向係澳門0既價位唔算係低水平~~
但呢家餐廳,
絕對會顛覆固有想法~~
老闆刻意選址係租金比較平0既黑沙環區,
所以就算食材由歐洲當地入口,
價錢都可以大眾化!
拾級而上，已經可以感受到氣氛～
餐廳裝潢簡單得黎又有異國特色,
2個人0黎又得, 一大班人黎gathering亦得~~
水吧位置就放左2隻西班牙火腿~~
版主勁鐘意~~(流口水中~~)
呢張最長0既枱,
其實係有特別設計,
專for試酒用的~~
中間那個打開係一個桶..
可以將試完d酒倒落去~~~
店長話…
呢度慶祝生日,
同自己帶酒係唔會收service charge同開瓶費,
所以幾乎晚晚都full booking架!!
Menu分Wine 同食物～
Hot regular Coffee
今次呢杯咖啡比上次的水準好好多~
奶是熱的,
咖啡味很濃~
D小姐讚不絕口~~
38個月伊比利牙黑毛豬火腿拼盤 (MOP$138)
特色蕃茄醬麵包配蒜蓉、橄欖油和蕃茄 (MOP$28)
黑毛豬火腿都係版主至愛~~
呢度0既火腿切得好薄!透哂光!~
單食都唔會覺得咸,
而且唔會好重油林林的感覺~
口感係帶點爽口彈牙~
好好味!!!
呢個麵包烘到外脆,
入面軟彈,
面頭0既蕃茄係用新鮮蕃茄蘑上去, 再加埋蒜蓉同橄欖油~
勁香~~
配埋ham食都好match!
廚師Special Salad (MOP$118)
呢個沙律係menu無的,
原因係作為亮點0既蕃茄係由法國入口~
所以食唔食到, 真係要睇緣份~~
來自法國0既有機蕃茄,
唔似中國的....不會有腥味….
配上菠菜同松子,
面頭0既係主廚自家醃0既三文魚,
因為配方入面有蘋果同橙,仲有d gin酒,
所以唔會腥之餘, 口感清爽, 肉質仲帶點彈性~
配上又fresh又清甜0既蕃茄,
好好味!
Sangría
西班牙水果酒(白酒) (MOP$50/杯)
西班牙水果酒(紅酒) (MOP$50/杯)
呢度0既Sangría 係由調酒師自己調配的,
同平時飲開0既唔一樣~~
因為果肉切得勁細粒,
所以飲落果味同甜味都好突出!
0岩哂女仔飲~~
個人喜歡白酒多過紅酒~^^
西班牙曼徹格芝士，小銀魚，焦糖洋蔥伴多士 (MOP$128)
樽仔入面0既係羊奶芝士,
而紫色一粒粒0既係用quince做0既jelly~~
有d甜甜地同少少酸~好開胃~
小銀魚係自家醃製,
唔怕咸同腥~~
個人最喜歡0既食法係用多士做底,
上面放銀魚同埋quince jelly..
感覺酸酸地好夾~~同埋會帶到魚0既鮮食出來~~
但D小姐就勁喜歡個cheese~
黎到呢個moment…
D小姐就酒興大發~~(佢係酒鬼…XD)
店長兼侍酒師就推介左呢支白酒~
係用左三種提子mix埋的(其中兩種就係甜提子同埋乾提子)
口感都唔錯
至少唔太好白酒0既我,
都覺得順口..hahahaha~
經典西班牙炸丸子奶油配火腿和雞肉 (MOP48)
呢個小吃記得樓下間西班牙烤雞也有,
問左店長有咩唔同,
佢話呢個入面加左D 西班牙火腿~~!!!
WOW!!!
唔怪得除左濃濃芝士味外,
仲食到有D火腿0既咸香~
正!!!
煎蛋配薯仔和西班牙腸 (MOP$48)
店長話,
好多客人0黎呢度,
指定要食呢個菜!
午餐可以食, 晚餐可以食..
面頭0既薯絲炸得超脆~~唔怕油~~
中間係一隻半熟荷包蛋~~
底下0既係西班牙腸~~
食法係先整穿隻蛋,
之後將所有野mix埋~~
包住蛋汁0既薯仔同埋已切成粒粒0既西牙腸,
好惹味!!
真係唔講得笑!!!!!!!!!!!!!!!!!!!!!!!!
所以我地食完之後話..早餐都可以食!!XD
西班牙海鮮飯 (MOP$358)
Barcelona 0既海鮮飯比樓下0既西班牙烤雞飯,
材料豐富好多,
所以價錢都會稍為貴dd~~
不過以份量同埋材料來講,
我地覺得非常合理!!
因為個湯汁比較濃0既關係,
所以唧少少檸檬汁,
帶少少酸, 可以食多d..XDDD
面頭0既海鮮有紅蝦, 海蝦仲有小龍蝦,
全部都好新鮮彈牙~~
D小姐又發揮地表最強食力,
1個人食左2/3~~
飯粒煮到索夠汁之餘, 仲粒粒分明~~
入面有雞肉, 蘑菇同魷魚~
魷魚唔會太 “un”
甜品:
西班牙心太軟配雲呢拿雪糕 (MOP$60)
同一般心太軟唔同,
佢地做法係拎個朱古力漿雪凍左,
再上粉拎去炸~~
外皮夠脆~
一定要趁熱連埋雪糕一齊吃~
食悶左傳統焗心太軟，可以試試呢個～^^
食後感:
餐廳環境唔錯~~
0岩哂夜晚同朋友傾下計…飲下酒, 吹下水~~
一大班人搞生日都唔錯~~~(因為免收蛋糕charge同埋開瓶費)
營業時間到夜晚2點~~
食物質素可以妣美五星酒店,
但價錢親民~~
唔怪得成為好多熟客0既飯堂~~
我同D小姐已經約好左叫埋其他朋友再去過~^^
餐廳資料:
名稱：BarCelona Tapas & Rice Spanish Gastro Bar
地址：澳門慕拉士街16號,富大工業大廈地下B座(消防局前面條巷)
電話: 2872 1084
時間：12：00～02：00
