Switch 滿分神作！Super Mario Odyssey 五大大好玩之處手機‧電玩

Switch 滿分神作！Super Mario Odyssey 五大大好玩之處

Super Mario 最新一集，亦係 Switch 第一隻全新 Mario 遊戲 -《Super Mario Odyssey》終於出左喇！究竟今集好唔好玩？由各大評測睇黎，呢隻就係繼 Switch《薩爾達》之後另一隻神作！

各大著名遊戲媒體都已經公開《Super Mario Odyssey》評測，當中兩大外國媒體 IGN 及 GameSpot 都比左 10/10 完美分數。Giant Bomb、GamesRadar、Game Rant、Trusted Reviews、GamesBeat 等著名網站全部都一樣比 10/10 滿分。

就算唔係比滿分嘅都近乎滿分，例如日本 Fami 通比左 39/40；Polygon 比 9.5 / 10。而綜合評分指標 Metacritic 就暫時得出 97 / 100 評分，瞬間已經同 Switch《薩爾達》齊名成為 2017 年暫時兩隻最好評遊戲。有時個別評分未必信得過，但當成個遊戲界都一致咁好評就基本上係神作無誤！

咁究竟今集有咩咁好？幫大家綜合主要幾點：

1. 遊戲內容極豐富，好有創意

有多個唔同世界，每個都好有自己特色。每個世界都有獨特同聰明嘅平台設計同考驗，經常都充滿新鮮感。就算睇落好似簡單直接嘅地方，都可能隱藏秘密位置，要玩家動下腦筋先去到

2. Mario 新能力有排玩

今集最大特點係 Mario 多左個新同伴：魔法帽 Cappy。首先可以自製平台跳、fing 出去攻擊，令 Mario 活動能力、靈活度大增。好多初初以為唔會去到嘅地方，只要靈活運用 Cappy 原來就去到。

不過最重要都係可以用 Cappy「上人身」。上唔同敵人身都有唔同效果同新能力，好多都好過癮、好得意。令你想試哂每一個組合，淨係呢樣都有排玩。

3. 畫面唔輸比其他平台大作

呢隻係 Switch 遊戲，純粹論解像度、細緻度未必夠 PS4 一級大作。但任天堂就好識得利用現有資源做出最佳效果，將 Switch 能力推至極限。而且以 Super Mario 嘅風格，根本唔洗靠規模同細緻度黎堆砌靚畫面，而係靠巧妙設計 (例如將 3D 結合經典 2D Mario) 同豐富色彩。簡單黎講，呢隻係至今畫面最靚嘅 Super Mario。

4. 玩完主線仲有大把野玩

以前打爆 Mario 之後可能都係玩下 speedrun 刷時間紀錄。今集除左呢樣，仲有好多其他野可以爆機後繼續玩。例如大量隱藏各地嘅 Power Moon，一般爆主線後只會揾到其中一部分。之後再細尋找，甚至可以解鎖主線都冇嘅新關卡。另外 Mario 嘅衣裝都係好吸引嘅收集元素，都係爆機後繼續玩嘅動力

5. 雙打比預想做得更好

今集 Super Mario 可以單機雙打，呢樣本身已經難得。更難得嘅係 2P 模式都有好認真咁製作，唔係為加而加。2P 會負責控制 Cappy 帽，而唔係另一個 Mario。無論操控或能力都同控制 Mario 好唔同，體驗同 1P 完全唔同。用 Mario 爆左一次機，下次用 Cappy 就有全新體驗。而且 1P 同 2P 要好好合作先可以順利過關，唔係純粹兩個鬥快行，互動性好高。

以上文章轉載自：http://game.uwants.com/viewthread.php?tid=19546001

－－－－－－－－－－－－－－－－－－