祈祂中心

標籤：祈祂中心

Mama is WITH YOU

澳城生活
覺醒媽 Awakening Motherhood ・2018-04-26

有時我個仔被嚇親或者扭眼瞓，就會喊得好犀利。呢個時候我最強嘅武器，就係隊個乳頭比佢啜住去安撫佢。但今晚，我隊個奶出嚟都唔夠用，阿仔嚇到個頭亂咁隊，連乳頭都搵唔到，淨係閤埋眼係咁喊，咁點呢？絕招都失效⋯⋯ 我抱住佢，望住佢喊，調一調整自己個狀態「噯～噯～噯～媽咪喺度，媽咪喺度。知道喇知道喇，媽咪知道你唔舒服。Mami is HERE...」好神奇地，仔好快就收咗聲重要秒睡。 其實呢個靈感來源係尋日睇咗條片喺非洲有個Safari guide對住隻衝緊過嚟嘅大象好冷靜咁企咗喺度，然後隻大象就衝衝下停咗喺度，冷靜咗！ 新手父母好多時一見到BB喊就會成個人魂飛魄散，「點算呢點算呢」然後「騰」住咁想搵方法塞住BB把口。有時用奶嘴塞住work係因為奶嘴可以安撫到佢。其實，BB係需要你嘅臨在，需要你安撫、保護。我哋嘅臨在，讓佢感覺安全。 「媽媽現在，在這裡，陪住你。」 「唔要奶嘴呀～Wheeee～～～」

經歷過懷孕與生產，還可以不相信有靈魂嗎？之二

澳城生活
覺醒媽 Awakening Motherhood ・2018-04-20

關於寶寶的性格，懷過孕的媽媽應該已經感受過，寶寶在我們肚裏面已經有自己的偏好。例如我們讓胎兒聽特定的音樂時「哎吔佢鍾意聽呢首」。爸爸和肚裏的寶寶傾計，寶寶會突然靜下來或動起來等等，還未計我們懷孕期間對食物的喜好的突然轉變。 《媽媽，我是為了你而來》這本書是由日本一位婦產科醫師所寫，在她接生和跟進過無數個生命之後發現，這些小生命早在胎兒時期已經有在母親肚子裏的記憶，甚至更早。但這些記憶通常在他們六歲之後就會消失。小孩子比成人是處於較慢的腦波，我們進行童年回溯甚至前世回溯就是會讓客人放鬆，讓大腦進入較慢的波段去進行催眠。 六歲前的小孩不用催眠已經處於這個波段，所以要做的就是讓他們輕輕鬆鬆地引導他們講一下「為什麼來媽媽身邊？」、「來之前在哪裡？」諸如此類問題。 書中很多答案都讓我很感動的。有的寶寶話在媽媽肚裏面一直為媽媽清掃，我震驚了一下。我懷孕時絕不能吃加工製品，一碰到就會孕吐，我當時對食物偏好都很有指標性的。還有我懷孕時對能量非常敏感，在場有人情緒不好或身體有問題，我望一眼也會孕吐。我相信寶寶在透過孕吐為我清掃一些積存的毒素，以及讓我避開那些頻率較低的環境。 寶寶還會記得自己怎樣出世，例如催生或剖腹產的寶寶會生氣「我還未準備好！」哎喲很可愛！這本書的答案很多都很可愛很感動，都是寶寶最純粹直接，來自靈魂充滿愛的答案。 而我的寶寶，還未開口說話，但當我聽到寶寶一出生那個哭聲，我已經聽到，一個溫柔的小靈魂經由我到達地球了。

經歷過懷孕與生產，還可以不相信有靈魂嗎？之一

澳城生活
覺醒媽 Awakening Motherhood ・2018-04-19

到現在，我仍然覺得生仔這件事是很神奇的，仍然「唔知呢件事係點發生」。 每當我提起，我老公就會同我講精卵結合然後開始同我講生物學然後話呢件事好科學。問題係，寶寶的意識，在什麼時候出現？你所認識的寶寶的記憶，什麼時候開始建立的？我們所認識的我們的仔女的性格，真的是全由我們塑造出來的嗎？他們來的時候有其本身的性格嗎？ 關於這兩個問題，這兩本書適時出現在我的生命裡面：《小靈魂與地球》《媽媽，我是為了你而來的》 《小靈魂與地球》在我剛開始「計劃」懷孕的時候，來到我手裡。這個「懷孕計劃」為期沒有很久，兩個月之後，我就和那兩條線相會。這本書是《與神對話》的童書版，故事講述小靈魂為什麼決定來地球以及來地球的目的是什麼。那時我只是剛決定要生BB，我一邊讀這本書，已經一邊被感動得淚流滿面。 這本書適合準媽媽和小朋友讀之外，還適合湊仔湊到懷疑人生的各位。記得除了你們抱在手裡的小靈魂之外，我們也曾經是小靈魂。 記得我們這次旅程的決志和目的。 下次講下《媽媽，我是為了你而來的》。 （圖片來源：《小靈魂與地球》）

一喊就抱？

澳城生活
覺醒媽 Awakening Motherhood ・2018-04-13

入媽媽group其中一個討論熱話係：「BB成日喊要抱，一放低就喊，到底抱唔抱？」 用心理發展個說法係，0至6個月係發展安全感嘅時期，呢個時候係需要無限滿足嬰兒嘅需要，咁第時佢先至會成為一個有安全感嘅人。當嬰兒時期嘅需要未能滿足，對於嬰兒嚟講就係直接嘅生命威脅。佢肚餓無得食就直接等於死；佢覺得自己唔安全，喊，但無人回應，等於無及時受到保護，又係直接等於死。係呀，BB真係唔嚇得㗎。佢無安全感嘅話，第時大個都會黐住你唔放，唔肯發達唔肯成唔肯搵女朋友唔肯結婚唔肯生仔⋯⋯ 媽媽就話「咁好啦，咁我寧願而辛苦啲，都想佢成為一個有安全感嘅人。」 如果用靈魂層面嘅角度嚟講，又會唔會係，需要抱抱嗰個，其實係媽媽，BB只係透過用喊嘅方式，要去抱抱你呢？ 愛與擁抱，根本是人的天性

生產的創傷

澳城生活
覺醒媽 Awakening Motherhood ・2018-04-08

我沒有選擇一個很容易的生產方式（根本沒有一個生產的方式是很容易的），我和老公都是剖腹產的寶寶，剖腹產的寶寶會比較容易焦慮，我們都是活活的例證。在沒有經歷過陣痛下出生的寶寶，對要出生的寶寶過程來說，就像是沒有預警下直接粗暴地揭起蓋得溫暖舒服的被子夾硬要寶寶起床，而且對寶寶來說，是突然揭被加上拔掉呼吸與進食的維生裝置，對寶寶來說這可是一個瀕死經驗，所以這些受到驚嚇的寶寶都會比較難湊，以及即使長大成人，他們都可能在潛意識之中以為自己仍未出世而長期凍結在嬰孩狀態，如果你是剖腹產而時常無故焦慮，可能就是來自出生時的創傷經歷，所以催眠和排列都會有處理出生創傷的方法。 我選擇自然產，希望可以給寶寶最好的出生方式，同時希望可以打破我和老公給寶寶的命運。後來才知道，「要為寶寶打破命運」這個想法是一件多可笑的事。 對於母親，「每日都有好多人生仔㗎啦」、「而家醫學咁先進，生仔好安全㗎喎」。事實是，生產是一次身體層面的巨大創傷。即使選擇剖腹，母親還是要經歷十月懷胎，那十個月身體裡面的骨架內臟等被慢慢地扭曲成符合寶寶生長的形狀，是慢性疼痛，以及那種對自己身體失去掌控的無力感，唔係一句「母愛真偉大」十個月就過去。如果這句說話真的有用，這十個月至少每小時都要服用一次吧。再講剖腹即使不經歷陣痛和全麻，作為一個人，知道自己會失去意識然後被剖開再搞一輪，而且自己完全無法控制，正常人都會感到恐懼。如果這個恐懼沒有被正視，或者你很堅忍痛到咁都唔會喊一聲，能量就會以其他方式渲洩出來。而其中一個方式，可能是產後抑鬱。

BB需求表

澳城生活
覺醒媽 Awakening Motherhood ・2018-04-05

當BB一喊或者扭嚟扭去，作為阿媽，一聽到佢喊係會「頻」嘅。個扭嚟扭去係細聲好多，但見住佢扭，你都唔會好過，於是你就會傾盡所有辦法去令BB返番去安靜舒適嘅狀態。但佢重未識講人話，佢嘅需要唯有透過觀察去知佢要啲咩： 肚餓？ 奶嘴？ 要掃風？ 嘔咗奶？ 抱抱？ 要媽媽奶奶？ 媽媽左邊奶奶？ 還是要右邊？ 係咪要安撫睡袋？ 係咪屙咗尿要換片？ 啱啱先換咗咋喎，唔通開咗大？佢鍾意係乾淨片片度開大㗎喎⋯⋯ 熱得濟？ 嘈得濟？ 係咪要娛樂？ 有嘢唔舒服？ 問題係，有時你好攰好眼瞓或者佢有新嘢同你玩咩都好，你就係會睇唔出佢要咩，咁唯有撞⋯⋯將上面個表由頭撞到尾。如果都撞唔中嘅話，分分鐘你再由頭到尾撞一次先至唔知點解今次又得。有時你問育兒專家都未必會答到你點解，但問你會higher self可能佢就係會答你：「臣服啦，臣服於耐性與開放嘅實習。」 寫完呢篇時間為上午11:11，我由今朝五點奮鬥到而家了。今次嘅答案係：之前餵完唔夠飽，試下再加一安，重扭，試咗換片掃風拎出拎入睡袋同勁歌熱舞一輪之後，原來，重唔夠飽，要再加三安。餵完，再加奶嘴同瞓媽媽心口，BB終於靜靜地瞓著喇。 但係，已經日上三竿，到我瞓唔返。

媽媽們，榮耀你自己

澳城生活
覺醒媽 Awakening Motherhood ・2018-03-22

話說我嘅生產過程有五日咁長。催生咗四日半，其中有兩日住咗入產房。 住產房嘅意思係，你瞓覺嗰張床就係助產士同你接生嗰張床，而一個產房有兩張床。喺我住產房呢兩日裡面，我同房已經有四個小生命係我隔離床誕生。其中一個生產過程令我最深刻。 我重瞓到矇矇鬆鬆嘅時候，大概係早上七點，隔離已經set好曬床進入產程。我聽到產婦話「我想大便呀⋯⋯」 醫生話「屙啦，屙佢出嚟！」 「吓，好尷尬喎⋯⋯」 醫生話「生仔就係咁！呢件係好神聖嘅事，有咩好尷尬！」 我係簾後驚嘆咗一陣子。 的確，生產係一件好神聖嘅事，係將生命帶來人間嘅過程，係對人類嚟講，理應係呢個世上最重要嘅一件事。喺「家庭系統排列」嚟講，母親嘅貢獻係大於父親，係因為女人冒住生命危險嚟延續呢個家族，但父權社就會將呢件咁重要嘅事turn down咗。又有一個現象係，而家好多人都唔願意生仔，我曾經就係其中一個。鬼咩，女人搵條命嚟同你搏，但男人就將呢個貢獻turn down，梗係唔同你生啦。 重有好多情況係，女人生完返到屋企仲要湊埋個老公，或者做咗白燕咁嘅家嫂，呢啲case一入媽媽group就一堆咁嘅「慎入抱怨文」。 嚟到呢度，我想講嘅係，各位媽媽，請你好好咁榮耀自己，因為你完成咗一件好神聖嘅任務，你為家族延續後代，讓人類繼續繁衍。如果你相信有神嘅話，女人就係透過自己嘅身體，將靈魂從神那裡帶到人間。 你，值得受到尊重。 如果你唔尊重自己，其他人都唔會尊重你。 最後，聽到BB嘅喊聲，醫生係簾後笑咪咪咁走出來。呢個醫生，唔係一個普通嘅醫生，原來佢就係我係一個離地程度相對高嘅身心靈工作坊上認識嘅醫生。醫生出嚟瀟灑地同我打招呼，「我盡量唔介入，讓佢自然生產。」 生產係一件充滿能量/ 生命力嘅事，係神聖嘅事，呢個係接生過咁多生命嘅醫生，再次提醒我嘅事。 順應生命之流 OM NAMAH SHIVAYA - 作者 吹時 家庭系統排列師 NGH註冊催眠師 擴大療法一階導師 天使卡導師 高敏一族 新手母親 身心靈中心Cator創辦人