親子

Tag: 親子

我想為你唱一首歌

Lifestyle
覺醒媽 Awakening Motherhood ・2018-06-18

我想為你唱一首歌，去表達我對你全部的愛。 但我找不到那首歌。 喉嚨有能量卡著，媽媽必須向你表達，望著你那巨大的幸福感。 也很想在你潛意識中，注入媽媽陪伴你，深愛你的感覺。讓這個旋律化成祝福，伴隨你一生。 即使將來你長大，去到天涯海角。 無計可施之下，我只可以哼歌，那來自我心深處的旋律，去釋放那無盡的感覺。 兒子，我愛你。媽媽從未試過愛一個人愛得這麼深，深得媽媽也害怕。 原來我可以愛得這麼深。 謝謝你，讓我體驗這充滿力量的感覺。 無論如何，請你記得我愛你。

抑鬱生存小貼士

Lifestyle
覺醒媽 Awakening Motherhood ・2018-06-15

上一篇講完我點好返法，呢篇講下我點樣係試出呢啲方法之前，馬景濤同木面表情之中令自己生活得似返個人啲。 1. 我的小太陽我個仔係我當時唯一溫暖到我嘅嘢，其他任何嘢對我嚟講都感覺唔到，係Facebook曬仔確係有減壓功效。有效就做，唔好同我講咩曬仔唔好，乜乜物物，我就嚟命都無，我要搵嘢吊住我條命緊要啲！ 2. 珍珠奶茶當時我食任何嘢都無乜味道，但爬台灣媽媽群文有話鮮奶茶有助催奶，我心裏面就燃起咗對鮮珍奶嘅渴望！亦都因為呢杯珍奶，每日引到我行出屋企去買同埋坐係公園曬一陣太陽。 3. 認咗佢我好到六分嘅時候我請朋友嚟我屋企比我曬仔，我都有好坦白咁承認我有產後抑鬱。當時雖然好到六成，但個狀態睇落去重係霉嘅。抑鬱時霉係好正常嘅事，如果你諗住你瞞得過，只會增加自己心裏面嘅負擔。 4. 見吓人抑鬱時真係好霉好唔想見人，又唔想照鏡見到自己嘅。生完身體未恢復嗰種面青青，同埋好無神彩嘅自己。但見人係真係會幫到你嘅原因係，你嘅生命需要流動，能量需要流動。見親人，見朋友都有幫助。畀佢哋畀支持你，比佢哋關心你，但就唔好迫自己見唔係太熟或者擔心人哋點睇你嘅朋友親戚，呢啲見一見又加大自己個壓力。 5. 向有能力嘅朋友求助初期我其實係無向人求助，開頭諗住荷爾蒙過咗之後就好返，又想自己拆掂佢，但拆到後來拆唔掂，就諗住開始扇啲風聲出嚟。但我又口硬，無正式向人求救⋯⋯但要有心理準備，唔係個個朋友都有能力應付你嘅抑鬱，有啲朋友可能好愛你，但見到你霉到咁，只識得喺你隔離喊埋一份。或者有啲朋友會急不及待搵個醫生比你，但其實你又唔想去睇，佢又會繼續迫你，又係會爆煲嘅。要搵啲經歷過風浪嘅朋友會比較好，佢哋至少識聽你講嘢，同埋比到安全感你。有咗呢啲力量去滋養之後，就會比較安心去繼續搵辦法處理嗰個抑鬱。 6. 唔好限制任何方法每個人條路都唔同，無公式。我自己嗰條都係試出嚟，A唔得就試B，B唔得就試C，意志！有嗰個一定要好返嘅意志不斷試！有呢個意志就一定會好返！ 抑鬱嗰段時間，成個instagram都係我個仔同埋我個仔。

產後抑鬱點好返

Lifestyle
覺醒媽 Awakening Motherhood ・2018-06-14

產後抑鬱係真係好需要家人嘅支持，但除咗借助外力，最重要係自己要有好返嘅意志！ 我能夠一個月內好返，其實係因為當時心裡OS：「你又話你嗰啲嘢（身心靈）幫到人，咁你又抑鬱？.......」。唔得，呢單嘢真係好瘀皮，我一！定！要！好！返！用盡任何我用到嘅方法！我都要快啲好返！ 雖然我上面感曬嘆號咁好似好勁，但其實當時我個狀態係馬景濤咁嘅（請重溫《點解上天要畀產後抑鬱我》配圖）。 當時抑鬱嘅程度係唔輕嘅，輕生嘅念頭係每日都出嚟巡一巡，但論牌面，我衣食無憂，老公又鍚我，照顧寶寶又有工人同媽媽雙重呵護，個仔重要超級超級超級可愛，理論上係唔「應該」有抑鬱，但係抑鬱係真係同外在條件無太大關係。 好！我就用盡我所識嘅方去處理我嘅抑鬱！ 1. 聆聽情緒背後訊息前文講過，第一樣嚟嘅係躁鬱，咁開頭未知就爆我老公爆到周圍都係。咁躁鬱嘅時候，再一次提提大家，千祈唔好以為「佢有病」就忍咗佢諗住忍過咗嗰期就算。我的確係有嘢委屈咗自己好耐，以寶寶同大家最大利益的話，我嘅改變，係真係有需要嘅。 2. 讓情緒出來抑鬱就係因為壓抑太耐，情緒係能量，你越壓住能量，佢越會亂咁唧，想喊就喊啦，但想鬧人就睇下有冇得唔好鬧得咁應，有冇啲易入口嘅方法去解決佢先，如果真係無，我會鼓勵你爆。嗱咁你自己就住爆，唔好釀成家暴諸如此類。 3. 負自己嘅責任好似我嗰啲委屈，其實除咗老公有份食住上之外，我都要攞返自己個責任，我唔夠尊重自己嘅感覺同意願，對自己無信心，怕失去，所以一直死忍去委屈自己。 4. 嘗試理解對方雖然你真係好偉大咁用條命生咗個人出嚟，你身體上嘅痛同創傷係好大，但如果你認真睇下隔離嗰個老公，佢見住你做場咁勁嘅大龍鳳出嚟，自己又乜都做唔到，其實都幾焦慮嘅。男人嘅嘢，重要通常有脆弱位都唔肯拎出嚟，仲要通常用另一種情緒去遮住，例如用憤怒去遮住內疚，甚至有時佢哋都唔會知自己原來係遮緊一啲自己嘅情緒。但我知，你已經馬景濤咁嘅樣仲要你去理解對方係唔容易嘅，但都係嗰句，意志！試！ 5. 要處理嘅就真係要處理我當時係hold唔住咁核爆我老公（多謝你咁都無放棄我嗚⋯⋯）爆曬啲委屈出嚟之後老公又好好咁作出改變，當時已經由十分躁鬱跌到六分抑鬱，好咗好多好多，所以需要改變嘅就必須要行動。重有六分我都要搞掂佢！ 6. 求助上面嗰啲自己可處理可嘗試嘅都做咗喇， 重會有無端端流眼淚同埋有唔想生存嘅念頭出現，我就知道一定重係有啲更深層次嘅嘢，我自己一個解決不了。於是我做咗幾次家庭系統排列，搵到我抑鬱嘅基調。原來係關於我同我原生家庭嘅一啲未被意識到嘅拉力，甚至係一啲關於我胎兒時期嘅想法，因為有呢啲想法而唔比自己得到幸福（？！）。係呀，其實好多人都唔比自己過得幸福㗎，你無見過人生得靚靚女女但偏偏就係賤人磁石，好多時都係因為一啲原生家庭嘅拉力，而令到佢哋唔畀自己幸福。 當我連結返我嘅母系祖先，我嘅父母，我決定比自己幸福同好好照顧自己之後，我嘅產後抑鬱就同我講byebye，我好似浴火重生咁返番嚟！之前嗰啲無端端流眼淚同輕生嘅念頭無咗，重覺得呢個世界係充滿愛。我最記得係，當我返到屋企見到我老公，佢送咗份生日禮物比我（如圖），我望住份禮物流眼淚。但今次係開心嘅眼淚，我感覺到我老公好愛我！我收到呢份禮物好感動！！！最搞笑嘅係，當時去衛生局檢查產後情況，有份產後抑鬱問卷比我填，我填完個姑娘為之震驚，話「嘩，你個狀態好好喎！」我話「係呀～」笑一笑，撥一撥頭髮就走出衛生局。 媽！我得咗喇！！！！！！ 我重生之後，我覺得自己充滿力量。我決定唔再委屈自己，坦誠去同屋企人溝通。我唔要比自己再次跌返入抑鬱裡面！同埋，我決定要用自己嘅經歷去協助需要協助嘅朋友。 蒲咗啲媽媽群咁耐，我係好驚訝於，點解群入面無人提過自己有產後抑鬱嘅呢？唔通我真係咁特別？但搵返資料原來病發率係好高㗎喎，十個有六個有，仲要有四個係抑鬱半年以上，甚至自此長期食藥。 希望我嘅經歷可以幫到有需要嘅媽媽或者抑鬱嘅朋友。如果有需要嘅，請聯絡我哋Cator，睇下有咩可以幫到手，唔好怕羞。 catorcentre@gmail.com 適逢生日，老公送咗呢條鏈比我，話係我同仔仔。「咁你呢？」「我係包住你哋嗰個心心。」我即時喊到豬頭咁，我終於都再次感受到我老公愛我喇！

人情百日宴

Lifestyle
覺醒媽 Awakening Motherhood ・2018-06-10

搞百日宴其中一個環節係「能量交換」，即係我哋比啲咩賓客，賓客又比啲咩我哋。當我重係度諗緊「蝦～啲人情夠唔夠cover張單呢？」，我老公就同我講要同阿仔開個戶口儲起佢。 我震驚了！原來我之前一直都聽唔明佢之前話個百日宴為仔擺嘅意思，佢嘅意思除咗嬰兒發佈會同設宴接受大家對寶寶嘅祝福之餘，收到嘅禮物都全部比曬寶寶。佢話「等佢第時大個出身嘅時候有得start up⋯⋯」。我啲人情概念重停留係結婚階段，覺得係收返成本，而家有小朋友，啲能量真係要往下流，唔再只係專注喺自己度喇。 上文講到我老公係凡人，唔會明白驚世鉅作，查實，佢先至唔係一個凡人，佢真係一個識得無條件咁愛嘅超級爸爸。 感謝各界對寶寶的祝福

百日宴曬仔曬自己

Lifestyle
覺醒媽 Awakening Motherhood ・2018-06-08

百日宴圓滿結束，寶寶終於食飽奶安睡了。喺宴會裡面，見住阿仔好似比人傳波仔咁傳法，做媽媽嘅係肉赤嘅。但我同時驚訝我個仔竟然傳足咁耐都無喊，重係我懷裡小急叉一陣之後，又笑曬咁，寶寶嘅生命力真係好強好純粹。 百日宴嘅嘢，坐月時已經考慮緊搞唔搞好，唔搞係因為本身我好怕人多嘅場合嘅，能量好混亂，去完人多場合會感覺好深層嘅內在枯乾。同時咁多長輩在場，枯乾咗又怕招呼唔到，壓力係呢度。選擇搞，係因為我個仔實在太得意，我好想同大家分享我嘅喜悅。同埋，我仔係鍾意見人嘅小甜心嚟嘅。 一個家族最重要嘅係後續有人，傳宗接代係人類生存嘅天性，新生命誕生係家族裡面嘅大喜訊，百日宴事實上係一個新聞發佈會，係一個家庭裡面最重要嘅新聞發佈時刻。同時，一百日係媽媽產後復出見人嘅一次隆重時刻，係媽媽經歷過死過翻生嘅重生，身體恢復好，係好值得慶祝嘅。 百日宴係一個有慶祝意義的宴會，我見過有媽媽朋友百日宴時完全無打扮過咁出嚟，個BB就好似公主咁隆重登場。當時個心痛咗一下。媽媽們，請你好好愛自己。將全副心機擺曬落仔女度，仔女係唔會開心。小朋友食「過度犧牲牌」嘅奶長大，即使小朋友長大成人，心裏面會有自卑同內疚。慶祝你自己死過翻生，慶祝你自己重獲新生吧，慶祝你喜獲來自上天嘅禮物吧。 百日宴雖然係慶祝，但我都係簡單搞，就咁印咗一塊掛畫，同埋造咗幾個人形攬枕（？！）。靈感來源係，抱住我個仔係我感覺過最美好嘅事，所以我特別整咗幾個人形攬枕比大家一齊分享。我老公開頭話唔好，話宴會拎出嚟太古怪，但驚世嘅創作凡人又點會明白呢？喺我創作魂嘅推動下，我靜雞雞做咗出嚟，老公見到實物笑到碌係度，重自己攞嚟玩咗好耐...... 攬枕拎到去百日宴大成功，大家都同假寶寶玩得好開心！又可以傳少啲我個仔，又有我個仔比大家玩，多謝各位！飲多杯！ 假寶寶：招呼唔到，飲多杯～ Photo Credit: Wendy Wong

點解上天要畀產後抑鬱我

Lifestyle
覺醒媽 Awakening Motherhood ・2018-05-31

我咁鍾意問上天問題，我當然有問點解要畀我有產後抑鬱啦，咪睇我而家笑笑口咁講，我問嗰時個狀態係好似馬景濤咁仰天長嘯「點解～～～」，咁上天又真係有比到答案我喎～ 我嘅產後抑鬱，係由躁鬱開始。我嘅核爆級憤怒，係將之前嘅生活方式來一次大摧毀，然後重新建立最適合自己同寶寶嘅生活環境。我之前有幾咁唔顧自己感受，有幾多嘢忍住唔出聲，去就住老公同其他人，怕其他人唔愛自己，今次焗住大核爆之後，就無得再忍再委屈。之前懶委屈驚人哋唔鍾意自己，咁爆一爆之後，且～原來佢哋唔會走㗎，爆完之後關係仲好咗，老公識關心返多啲自己。 我之前忍得咁辛苦，躁鬱就將之前儲埋嗰啲能量一嘢爆返出嚟。爆乾淨之後又點呢？開始depress... 個人無表情，食嘢無味，個頭好似有嘢罩住自己，即使老公捉住我隻手話好愛我都感受唔到。好，點解！！！ 抑鬱嘅經歷，係畀我抑鬱完之後更識得珍惜有感覺嘅美好，等我抑鬱完出返嚟唔好再返番去以前嘅模式。以前嘅模式係抑壓自己真正所想所需，抑鬱就係「你咁鍾意抑壓自己感受，就比你感受下抑壓到盡係點啦」，就係好似喪屍咁，笑又笑唔出，又無乜感覺，又無啦啦唔知點解想喊。 我哋每個人嘅生命係有目的而來，當我哋活出自己就會好開心，上天都會幫你。但活唔出我哋嘅目的，去錯路徑就自然會出問題。我哋忍受住一啲嘢就係違反自己本來應該順應嘅道路，就會唔開心囉。另外，有過創傷又無面對嘅，都係忍住咗一啲嘢，咁生命能量又係會受阻塞。 好喇，講完點解要抑鬱，下次講我點好返。 「點解要我產後抑鬱～～～～～」

坐月母夜叉

Lifestyle
覺醒媽 Awakening Motherhood ・2018-05-26

生完正常三日出院，但因為我個傷口比較大（我個仔出世時成8磅幾）同埋有血腫，再加上我本身比較敏感，我生完頭兩日都痛到重未落到床。姑娘見我咁嘅環境就建議我留多日，但我老公用佢史力加貓嘅亮晶晶眼去期待我同寶寶早日出院，我就心軟。「好啦，返到屋企都係瞓床㗎啫⋯⋯」點知，咁就領嘢⋯⋯ 出院返屋企嗰程痛就預咗，以為捱到返屋企上到床就係終點，上到床我先至體驗到我嘅天真。喺醫院一日三餐都有人照顧，寶寶餵奶換片又有人教同搞掂，我需要做嘅就係將寶寶個嘴仔對正我乳頭，同埋將自己個嘴仔對正羹飯，其他嘢就會自動發生。但返到屋企雖然有工人同月子餐，但都要有指令啲嘢先至會發生，夜晚無工人老公第二日又要返工。我仰天長嘯：「點解～～～～點解上天要設計到初生嬰兒三個鐘頭食一次奶～～～～～～！」我問上天問題，總是會得到回應。 終於，返屋企第五日，我喺休息唔夠、對住初生嬰兒嘅焦慮同忍受身體痛楚，再加上我老公（佢係西人，我唔係鬧佢，佢真係一個西人）毫無坐月嘅概念唔識體諒之下，我崩潰了。我心裏面嘅憤怒好似一個個原子彈咁爆出嚟，所有我委屈的、不順眼的、新的、舊的問題一次過爆出來，我當時覺得甚麼也沒所謂了，我要毀滅一切。我歇斯底里咁鬧人，係屋企入面尖叫。首當其衝領嘢嘅，當然係我老公⋯⋯ 「我為咗你早咗一日出院！」呢句係我心裏面忍咗五日嘅說話。但係其實明明早咗一日出院咁大把啫，點解個憤怒可以變成原子彈嘅級數呢？ 我之前一直都委屈自己，我明明好痛都要為咗老公而早出院。這一直是我和其他人相處的模式，總是以其他人優先而委屈自己。漸漸地，當你嘅委屈自己變成習以為常，唔好咁傻以為啲嘢下下忍到過到骨就算。能量嘅嘢要還㗎。 問題徵結在於，我怎麼從來不愛自己？不顧自己感受，終於釀成今次大核爆呢？（我真係好鍾意問點解） 然而，今次大核爆將之前所有委屈都迫我表達出來了，老公終於知道和接收到了。那條委屈的list很長！我將之前的所有委屈都攤出來，我老公真係好好，我所爆的他都有聽，然後協商。今天協商完第二天我又突然醒起之前委屈了什麼，我就whatsapp我老公鬧一條水蛇春咁長的訊息，當時他每天的lunch break都奉獻了在回應我的核爆之上。直至第三個禮拜我嘅委屈都爆完了...... 我以為只是同老公積存太多委屈要表達所以先搞成咁，但爆到第二個禮拜，我已經發現月子餐啲味唔同咗，原來係抑鬱令到我無胃口。再到爆乾淨曬啲委屈之後，我心情低落，沮喪。 蝦，無理由㗎喎，老公都順攤曬啦，應該大團圓結局先係，點解仲咁心情低落呢？終於我肯聽我老公講，開始留意產後抑鬱係咩嚟...... 問咗咁多個問題，下回分解。 坐月時身體弱又唔夠瞓病咗幾次，圖中條毛巾係用嚟接住我退燒時狂流嘅汗。

我從產後抑鬱裡重生了

Lifestyle
覺醒媽 Awakening Motherhood ・2018-05-11

人最怕的不是死，而是半生不死。抑鬱是活折磨，當時每日都有一段時間無故流淚，而恆常的狀態是沮喪。非常沮喪。 面無表情，頭的四周像有一層濃霧罩住自己。食物沒有味道，只知道要吃飯而感受不到飽餓。即使老公和我說「我愛你，我在這裡支持你」，我兩顆眼淚滴下來告訴他，「我感受不到。我覺得你好像在叫口號。」我覺得很孤立無援，很自卑。我覺得，我的生命在逐漸消失。 是的，之前你讀的部份覺醒媽文章，是我在產後抑鬱時所寫的。很感謝這個平台，寫覺醒媽的文章時，能讓我專注在文字裡面，暫時忘記沮喪。很感謝Cator的編輯，她鼓勵我繼續寫，在抑鬱裡其實是很難集中精神的，但有編輯做我後盾，讓我寫得很安心。而寶寶是我的小陽光，靠在睡著的他身傍，親他的臉珠，是我生存的意志。 現在我很感恩抑鬱這份禮物，他迫使我面對我自己心靈最深處的問題。這一次，我非改變不可了。一直以來，我忽略自己的感受，時常要為別人做什麼，必須貢獻點什麼。見到身邊的人開心，我才鬆一口氣。但，如果別人選擇要保持不開心呢？如果別人選擇留在悲劇裡呢？ 經歷過抑鬱，我才明白，原來我的人生之前大部份都在輕微的抑鬱狀態裡。我從來沒有善待自己，我沒有照顧好自己的身體和感受。 我回來了，我的整個生命回來了。以後我不會再委屈自己了，當我一委屈自己，那個抑鬱的感覺又想要跑出來。夠了，我抑鬱夠了。我以後要活得快樂。 母親節快樂，是我的選擇。下次再講我點行出嚟。 正在用彩油46號，漂泊者。嗯，就是那個孤立無援的我啊。我從這裡重生了。

寶寶愛我嗎？

Lifestyle
覺醒媽 Awakening Motherhood ・2018-05-06

對著我的初生寶寶，基本上他和動物一樣，沒有說話的能力，每天只是吃奶、屙、睡覺。每次他醒著的時候，或者我們的互動，都是我在服務他。咁辛苦三更半夜起身餵奶，忍臭換屎片，他愛我嗎？他真的知道我愛他嗎？ 作為動物傳心師，其中最熱門（不是之一）的問題，一定是「動物愛我嗎？」我當年就是其中一個問這個問題的動物家長。 我之前一直覺得我的貓貓都比較喜歡我老公，對於我，我只是同屋住的另一個人。覺得她會嗲我，都是因為在索求食物，或者老公不在家才退而求其次...... 當我知道我的貓貓很愛我之後，我和她的關係起了戲劇性的轉變。我開始看見她對我的愛，看見她有多愛我。至於她愛我還是我老公多，已經不再重要了。 而我的寶寶，在我肚裡面的時候我已經知道他很愛我。但在照顧他的時候、壓力大的時候，還是不禁會問，「他愛我嗎？」甚至寶寶第一次望住我放心心咁笑，唔夠瞓的我都會不禁懷疑，那個笑是他喜歡我？還是我有咩咁好笑呢？ 在這裡，我可以告訴大家，無論是你家裡的寵物，還是你的初生寶寶，他們都一定很愛很愛你。他們愛你的程度，甚至多於你愛他們。他們對你的愛，是無條件的愛。因為，每個靈魂最原本的狀態，都是充滿愛。我們或動物們投身到地球，都是帶著愛而來。 「無條件的愛」的意思是，他們愛你不是因為你餵奶或給貓糧，不是因為你有幾及時為他換屎片。他愛你，是因為你是他媽媽，就是這麼純粹。即使你換片換遲咗，「暗」極佢都喊到拆天，那個喊到拆天的寶寶仍然是很愛很愛你。只是肚餓或其他需要，讓他們只可以用哭的方式告訴你。 反而，我們活到這把年紀，已經忘了如何無條件地去愛。社會教我們要叻、要乖、要競爭、要聰明醒目才值得成功，才有價值。做父母就很容易跌入這個恐懼模式去對待自己的小孩，因為擔心自己的小孩將來在社會沒有競爭力，就同佢講「你乖／叻／醒先至抵鍚」。然而事實是，我們即使幾令爸爸媽媽嘔血，爸爸媽媽仍然會愛你。只是他們的頭腦會告訴他們，「要這樣對他們才會xxxx」⋯⋯ 大人都活在口是心非之中。寶寶和小動物，就不會這麼扭擰。 而家我已經話咗比你知寶寶同小動物好愛你，而家你可以試下帶住呢個假設去同佢哋相處。歡迎feedback返畀我，期待你嘅好消息。 Feedback可以去呢度feed：catorcentre@gmail.com 時常對我瘋狂放心心的寶寶

湊BB唔係一個人嘅事

Lifestyle
覺醒媽 Awakening Motherhood ・2018-04-30

尋日自己做咗個好簡單但好有力量嘅排列。由於我係新手媽媽嘅關係，BB喊總係會不知所措，甚至開始驚單獨面對BB，驚自己搞佢唔掂。 尋日排咗BB同自己、BB同老公嘅關係，原來BB係好愛我，代表我個仔嘅代表重感覺到原來BB知道我好愛佢，知道佢瞓覺嘅時候我會望住佢（哎好冧）。我之前覺得湊BB淆底，好驚佢喊我會唔識處理，又覺得老公好粗線條會整親BB。其實湊BB唔係一個人嘅事，係需要人支持。我之前以為老公搞唔掂BB，排出嚟原來BB係咁愛爸爸同埋感覺咁安全。 而家排完之後對住BB嘅壓力大減，見到老公抱住BB，我感覺由心裡面幸福出嚟～哈哈哈～（尷尬笑） 5月5我哋有個家庭系統排列工作坊，希望可以透過排列，讓更多人感受到愛再次流動嘅美好。詳情： https://www.facebook.com/events/594029350953681??ti=ia 老公成日做啲危險動作為娘表示擔心，但原來個仔覺得好正囉⋯⋯

Mama is WITH YOU

Lifestyle
覺醒媽 Awakening Motherhood ・2018-04-26

有時我個仔被嚇親或者扭眼瞓，就會喊得好犀利。呢個時候我最強嘅武器，就係隊個乳頭比佢啜住去安撫佢。但今晚，我隊個奶出嚟都唔夠用，阿仔嚇到個頭亂咁隊，連乳頭都搵唔到，淨係閤埋眼係咁喊，咁點呢？絕招都失效⋯⋯ 我抱住佢，望住佢喊，調一調整自己個狀態「噯～噯～噯～媽咪喺度，媽咪喺度。知道喇知道喇，媽咪知道你唔舒服。Mami is HERE...」好神奇地，仔好快就收咗聲重要秒睡。 其實呢個靈感來源係尋日睇咗條片喺非洲有個Safari guide對住隻衝緊過嚟嘅大象好冷靜咁企咗喺度，然後隻大象就衝衝下停咗喺度，冷靜咗！ 新手父母好多時一見到BB喊就會成個人魂飛魄散，「點算呢點算呢」然後「騰」住咁想搵方法塞住BB把口。有時用奶嘴塞住work係因為奶嘴可以安撫到佢。其實，BB係需要你嘅臨在，需要你安撫、保護。我哋嘅臨在，讓佢感覺安全。 「媽媽現在，在這裡，陪住你。」 「唔要奶嘴呀～Wheeee～～～」

經歷過懷孕與生產，還可以不相信有靈魂嗎？之二

Lifestyle
覺醒媽 Awakening Motherhood ・2018-04-20

關於寶寶的性格，懷過孕的媽媽應該已經感受過，寶寶在我們肚裏面已經有自己的偏好。例如我們讓胎兒聽特定的音樂時「哎吔佢鍾意聽呢首」。爸爸和肚裏的寶寶傾計，寶寶會突然靜下來或動起來等等，還未計我們懷孕期間對食物的喜好的突然轉變。 《媽媽，我是為了你而來》這本書是由日本一位婦產科醫師所寫，在她接生和跟進過無數個生命之後發現，這些小生命早在胎兒時期已經有在母親肚子裏的記憶，甚至更早。但這些記憶通常在他們六歲之後就會消失。小孩子比成人是處於較慢的腦波，我們進行童年回溯甚至前世回溯就是會讓客人放鬆，讓大腦進入較慢的波段去進行催眠。 六歲前的小孩不用催眠已經處於這個波段，所以要做的就是讓他們輕輕鬆鬆地引導他們講一下「為什麼來媽媽身邊？」、「來之前在哪裡？」諸如此類問題。 書中很多答案都讓我很感動的。有的寶寶話在媽媽肚裏面一直為媽媽清掃，我震驚了一下。我懷孕時絕不能吃加工製品，一碰到就會孕吐，我當時對食物偏好都很有指標性的。還有我懷孕時對能量非常敏感，在場有人情緒不好或身體有問題，我望一眼也會孕吐。我相信寶寶在透過孕吐為我清掃一些積存的毒素，以及讓我避開那些頻率較低的環境。 寶寶還會記得自己怎樣出世，例如催生或剖腹產的寶寶會生氣「我還未準備好！」哎喲很可愛！這本書的答案很多都很可愛很感動，都是寶寶最純粹直接，來自靈魂充滿愛的答案。 而我的寶寶，還未開口說話，但當我聽到寶寶一出生那個哭聲，我已經聽到，一個溫柔的小靈魂經由我到達地球了。

經歷過懷孕與生產，還可以不相信有靈魂嗎？之一

Lifestyle
覺醒媽 Awakening Motherhood ・2018-04-19

到現在，我仍然覺得生仔這件事是很神奇的，仍然「唔知呢件事係點發生」。 每當我提起，我老公就會同我講精卵結合然後開始同我講生物學然後話呢件事好科學。問題係，寶寶的意識，在什麼時候出現？你所認識的寶寶的記憶，什麼時候開始建立的？我們所認識的我們的仔女的性格，真的是全由我們塑造出來的嗎？他們來的時候有其本身的性格嗎？ 關於這兩個問題，這兩本書適時出現在我的生命裡面：《小靈魂與地球》《媽媽，我是為了你而來的》 《小靈魂與地球》在我剛開始「計劃」懷孕的時候，來到我手裡。這個「懷孕計劃」為期沒有很久，兩個月之後，我就和那兩條線相會。這本書是《與神對話》的童書版，故事講述小靈魂為什麼決定來地球以及來地球的目的是什麼。那時我只是剛決定要生BB，我一邊讀這本書，已經一邊被感動得淚流滿面。 這本書適合準媽媽和小朋友讀之外，還適合湊仔湊到懷疑人生的各位。記得除了你們抱在手裡的小靈魂之外，我們也曾經是小靈魂。 記得我們這次旅程的決志和目的。 下次講下《媽媽，我是為了你而來的》。 （圖片來源：《小靈魂與地球》）

一喊就抱？

Lifestyle
覺醒媽 Awakening Motherhood ・2018-04-13

入媽媽group其中一個討論熱話係：「BB成日喊要抱，一放低就喊，到底抱唔抱？」 用心理發展個說法係，0至6個月係發展安全感嘅時期，呢個時候係需要無限滿足嬰兒嘅需要，咁第時佢先至會成為一個有安全感嘅人。當嬰兒時期嘅需要未能滿足，對於嬰兒嚟講就係直接嘅生命威脅。佢肚餓無得食就直接等於死；佢覺得自己唔安全，喊，但無人回應，等於無及時受到保護，又係直接等於死。係呀，BB真係唔嚇得㗎。佢無安全感嘅話，第時大個都會黐住你唔放，唔肯發達唔肯成唔肯搵女朋友唔肯結婚唔肯生仔⋯⋯ 媽媽就話「咁好啦，咁我寧願而辛苦啲，都想佢成為一個有安全感嘅人。」 如果用靈魂層面嘅角度嚟講，又會唔會係，需要抱抱嗰個，其實係媽媽，BB只係透過用喊嘅方式，要去抱抱你呢？ 愛與擁抱，根本是人的天性

生產的創傷

Lifestyle
覺醒媽 Awakening Motherhood ・2018-04-08

我沒有選擇一個很容易的生產方式（根本沒有一個生產的方式是很容易的），我和老公都是剖腹產的寶寶，剖腹產的寶寶會比較容易焦慮，我們都是活活的例證。在沒有經歷過陣痛下出生的寶寶，對要出生的寶寶過程來說，就像是沒有預警下直接粗暴地揭起蓋得溫暖舒服的被子夾硬要寶寶起床，而且對寶寶來說，是突然揭被加上拔掉呼吸與進食的維生裝置，對寶寶來說這可是一個瀕死經驗，所以這些受到驚嚇的寶寶都會比較難湊，以及即使長大成人，他們都可能在潛意識之中以為自己仍未出世而長期凍結在嬰孩狀態，如果你是剖腹產而時常無故焦慮，可能就是來自出生時的創傷經歷，所以催眠和排列都會有處理出生創傷的方法。 我選擇自然產，希望可以給寶寶最好的出生方式，同時希望可以打破我和老公給寶寶的命運。後來才知道，「要為寶寶打破命運」這個想法是一件多可笑的事。 對於母親，「每日都有好多人生仔㗎啦」、「而家醫學咁先進，生仔好安全㗎喎」。事實是，生產是一次身體層面的巨大創傷。即使選擇剖腹，母親還是要經歷十月懷胎，那十個月身體裡面的骨架內臟等被慢慢地扭曲成符合寶寶生長的形狀，是慢性疼痛，以及那種對自己身體失去掌控的無力感，唔係一句「母愛真偉大」十個月就過去。如果這句說話真的有用，這十個月至少每小時都要服用一次吧。再講剖腹即使不經歷陣痛和全麻，作為一個人，知道自己會失去意識然後被剖開再搞一輪，而且自己完全無法控制，正常人都會感到恐懼。如果這個恐懼沒有被正視，或者你很堅忍痛到咁都唔會喊一聲，能量就會以其他方式渲洩出來。而其中一個方式，可能是產後抑鬱。