蘭香閣取糭記

合資格90後 ・2017-05-25

一年一度嘅端午節又嚟啦，話說今年有位朋友，皇恩浩蕩賜咗幾張糭卷比我(心諗咁好益我)，點知係因為屋企太多先拖捨幾張比我。嗱，呢啲咪朋友囉，分分鐘下次錢太多，分啲過我洗添呀﹗ 其實以往過節，屋企啲糭大多係親戚ABCD友情讚助，根據過往經驗，一個禮拜三餐食糭不是夢。但點解今次我咁睇唔開要去攞糭卷呢？之唔係個朋友話啲糭係蘭香閣囉，還記得細個曾經食過，但後來因為友情讚助太熱烈，已經好一段時間冇食。既然又有個機緣巧合，一於去會一會佢先﹗ 還記得攞糭當日，下班遲了，時約7點，天幕已經蓋上一層黑布，我騎着私家電單車，一路前往蘭香閣，晚上的氣溫、濕度正好，可以慢慢細味春天與別不同的味道。哎，乜突然咁文雅嘅？唔通我攞過杰出青年獎又話比你知咩﹗ 其實蘭香閣喺澳門有返啲日子，算得上年老字號之一。由於我不太確定蘭香閣所在位置，於是提早泊好車，打算順道遊覽附近的古舊建築，亦找來居住在附近的居民閒聊幾句(我不會告訴你，我在問路的)，走走逛逛，終於到達蘭香閣。只記得在門前已經依稀聞到糭子的味道，進入店內，一種充滿“舊式茶樓仔”感覺就在眼前，大門兩側的走廊掛滿形形式式的糭子，粒粒都非常飽滿，令人垂涎三尺。 店內裝飾沒有令人眼前一亮的感覺，反而是種種勾起兒時回憶的擺設，大圓枱、木櫈、蒸籠、就連牆身、地磚都都好像停留在兒時的回憶，匆匆的時間似乎略過了這間悠久的小店。雖然已臨近8點，但來攞糭的人依然絡繹不絕。我在老板娘的手上接過糭後，就施施然離開了店。在回家的路上，我在想，聽日一於去跑步啦，今晚去食個頹餐先，完﹗