錶奴系列 - 精工錶入手開箱文

合資格90後 ・2017-10-25

話說早兩日出糧，我又按奈不住的入手了一隻精工錶，以下就同大家分享一吓呢個品牌以及手錶嘅吸引之處啦﹗ 事不宜遲，去文～～～～ 精工錶之所以賣到街知巷問，當然除咗價錢親民外，更重要係耐用，加上造工精細，所以一直以來都受錶迷所吹棒。 接住同大家分享吓呢個品牌一啲威水史啦，其實早喺石英錶面世以前，機械錶係當時唯一選擇，但由於製作一枚機械錶要經過相當多的工序，所以價錢當然亦較昂貴。但自從精工喺1969年製作出世界上第一枚石英錶後，震撼咗整個製錶界，更掀起咗一埸「石英風暴」，結果係點？結果就係瑞士製錶業大敗，亦令當時唔少WatchMaker，甚至工廠倒閉。厲害吧﹗一個品牌打趴整個製錶業界。 打開錶盒，已經聞到一陣錶香味，唔洗懷疑，係錶味，亦只有開箱一刻至會釋放。錶盒以純白配銀色Logo，看上去簡潔大方，送禮更是一流，不過今次就送比自己。 以往我買手錶，都偏向Sporty為主，而今次係破天荒第一次買文青路線的手錶。老實講，第一次見到呢隻錶嘅時候，遠望以為係卡地亞嘅藍氣球，當然，有人可能會話，藍氣球特色係上鏈位置的專利設計，但對我而言，大羅馬刻度更係藍氣球嘅一大賣點，講遠咗添...。大羅馬刻度、開芯設計、藍指針(相信只係顏料塗層)、純白錶盤，加上光滑簡潔的錶框，令我一眼就對佢愛不惜手。開芯位置更可以欣賞整個擒縱系統，以及游絲時大時細的變化，非常具觀賞性﹗ 再睇睇錶底，老實講，普遍機械錶大多都係大門打開，方便大家欣賞機芯嘅“精細”。而機芯裡比較特別就是金色圓輪中紅色的一點，不要懷疑，呢粒係紅寶石，只不過係人造而已，基本上每杖機芯都會有紅寶石，個人覺得純粹裝飾之用，但別有一番特色。唯一可惜的是，擺陀的擺動並不明顯，這就是一分錢一分貨的道理。相比瑞士高級的手錶品牌，人家的機芯得花上以月計算的日子製作，每件零件都是工匠親手打磨、拋光、印壓而成，每枚都是獨一無二的精品﹗當然，呢隻錶以我入手的價錢來計，已經算是不錯了。 以上是一次不專業的開箱分享，期望未來有好多好多錢，再多多同大家分享“錶”!